شرح: عمل جيلبريك للآيفون فور إس iPhone 4S | و الآيباد 2 iPad

قائمة بأسماء الأعضاء المهشتقين في هالموضوع :
اكتب أسماء الأعضاء اللي ودك تهشتقهم في هالموضوع وافصل بين يوزراتهم بفاصلة زي كذا : فالكم طيب، منجطل بالطاية، فارس، رماد انثى All Friends

28-1-2012, 1:31 AM

مشاركة رقم المشاركة : 1

طحينيه

من كباريّة الضياع

طحينيه غير متواجد حالياً

شرح: عمل جيلبريك للآيفون فور إس iPhone 4S | و الآيباد 2 iPad

بسم الله الرحمن الرحيم ..

السلام عليكم ورحمة الله وبركاته .. تماشياً مع توجه الضياع التقني من تالي نزلّت هالموضوع .. وهو أول موضوع تقني لي في منتدى الضياع ( وش تبينا نسويلك ؟

) .. حقيقةً إكتشفت إن قسم التقنية صار هو قلب المنتدى من عقب ماكانت البشكه هي القلب والكبد والكلاوي وكل شئ بالنسبه للضياع .. صرنا ماعاد نشوف عضو يكتب في البشكه غير منجطل بالطايه سيئ الذكر

.. تشوفه يكتب موضوع في البشكة ويرد على نفسه

.. وعابد من تالي بعد جاته نفسيّه ماعاد يكتب في الأقسام .. تلقاه في مدونته ويخثرق والظاهر طاح في الحشيش ومانحط شئ بالذمه .. والا وش اللي يخليه يكتب مقالة عن المحشّشين والبيّاعين وهو قبل أمس يتكلم عن المطاوعه ويمدحهم ؟!

<< ماودك يفكّر

.. معليش يامنجطل وياعابد من اليوم ورايح لاتعرفوني ولا أعرفكم والكلام للشلّه كلهم

.. أنا بصراحة إكتشفت إن مواضيع التقنيه أسهل وأسرع ومايحتاج تعصّر مخك وتجهد بنيّات أفكارك وتكتب تسلسل الأحداث ومدري وش وفي الأخير يجيك حدا الأعضاء يقول مافهمت من القصه شئ غير المقدمة

.. وهذا اللي يخلي أغلب الكتّاب ينهون مواضيعهم بـ " مايستفاد من الموضوع 1 2 3 " عشان مايتحطّم لاشاف الردود

الزبده يا اخوان هذا شرح جيلبريك للآيفون فور إس وللآيباد 2 .. وحاولت أبسّط الشرح قدر المستطاع وإن شاء الله محد يواجه صعوبه في التطبيق .. و بسم الله نبدأ ..

أول شئ لازم تتوفر عندك هالثلاث أشياء عشان تقدر تطبق الجلبركه :-

1- عندك جهاز آيفون فور إس iPhone 4S | أو | جهاز آيباد iPad 2 .

2- يكون إصدار النظام iOS عندك هو : 5.0.1 ( وإذا إصدار نظامك قديم ومغبّر .. لازم تسوي له تحديث عن طريق الآيتيونز و تجي )

3- عندك جهاز لابتوب + وصلة USB لجهازك سؤاء الآيفون أو الآيباد .

ودامك دبّرت هالثلاث شروط خلنا نبدأ الشرح :

1- تشبك آيفونك بالكمبيوتر ثم تفتح الآيتيونز وتسوي مزامنة زي ماتسويها دايم , وبعد ماتخلص المزامنة تشيل علامة الصح من عند خيار التشفير الخاص بالباك أب عشان تقدر تسوي جيلبريك ( بعد ماتسوي الجيلبريك تقدر ترجع وتحط علامة الصح من جديد لاتخاف

)

بعد ماتشيل علامة الصح راح يسوي الجهاز باك أب تلقائي غير مشفر ، انتظره لين يخلص وبعدين افصل الآيفون من الكمبيوتر وقفل برنامج الآيبتيونز .

2- حمّل أداة الجيلبريك ( اللي يقال لها أداة absinthe ) على كمبيوترك ( حسب نظام التشغيل عندك ) :

-- لأصحاب الويندوز ( اضغط هنا )

-- لأصحاب الماك ( اضغط هنا )

الملف اللي حملّته فوق يجيكم مضغوط .. فلازم طبعاً تفك الضغط عنه قبل نبدأ عملية الجلبركة ( صبركم علي ياجماعة

) .

3-نشبك الآيفون بالكمبيوتر ( وانتبه تفتح برنامج الآيتيونز اخبركم ملاقيف

) ثم اضغط على أيقونة أداة الجيلبريك ( الجمجمة الخضراء الله لايبلانا )

4- اصبر شوي ثم اضغط على زر JailBreak ، وراح تبدأ الأداة تسوي الجيلببريك لجهازك وماعليك إلا إنك تنتظر ولاتصير ملقوف وتقعد تبربس في الجهاز .. اركد عشان مايخرب شغلنا

5- إذا إكتملت العملية وصار الخط كله أزرق .. وطلعت لك الشاشه اللي مكتوب فيها Almost Done :

افتح آيفونك ( بدون ماتفصله من الكمبيوتر ) ثم دوّر على أيقونة أداة الجيلبريك (الجمجمة الخضراء خويّتنا

) واضغط عليها وانتظر لين تكتمل عملية الجلبركة بالشكل الكامل .

والحين الحمد لله خلّصنا عمل الجيلبريك لجهازك الآيفون فور إس أو الآيباد تو بنجاح ، وعشان تتأكد من نجاح التجربة راح تشوف أيقونة السيديا Cydia في آيفونك واضغط عليها ونزّل البرامج على راحتك مجاناً .. ومنّة الله ولا منّة خلقه

الملاحظات والمشاكل :

1- الطريقة سويتها على جهاز آيفون فور إس وماواجهني أي مشكلة بإستثناء إن الصور إختفت من مجلد الصور بعد العملية لكن طفيت الجهاز وشغلته مره ثانيه ورجعت الصور وغير كذا ماشفت مشاكل وكل شئ مزبوط

2- إذا سويت الطريقه وواجهتك مشاكل لاتقعد تبربس في الجهاز .. تعال هنا الله لايهينك واطرح مشكلتك وإن شاء الله أعطيك الحل المناسب

وختاماً أشكر أبو نواس وهنّو على مساعدتهم ( مع إنهم رفعوا ضغطي

.. يعطوني مراكز تحميل ماتشتغل وخربانه

.. أهنت نفسي وأنا أطلبهم يرفعون لي الروابط على الضياع

) .. أقول أشكرهم وإن شاء الله ماعاد أتعاون معهم ولا أطلب منهم شئ والله لايحوجنا لهالأشكال قولوا آمين

.. وإن شاء الله مايكون الموضوع الوحيد في التقنيه .. ومثل ماقلت لكم بأن توجّهي من اليوم ورايح تقني الله لايعوقني بشرّ

.. بس أبعدوني عن طاحس ومنجطل وعتعت وعابد ومضيّع بيتهم وغيرهم الكثير من الدشير في المنتدى

.. أبعدوني عنهم وأوعدكم أني أسحب على كل الأقسام وأسنتر في هالقسم الخفيف على القلب 25 ساعه

فارس و عين الداب و مني خذوك ! و 7 أعضاء آخرون معجبون بهذه المشاركة .

توقيع طحينيه :

يادنيا .. من أنتي له ؟!

28-1-2012, 1:43 AM

مشاركة رقم المشاركة : 2

طاحس

من كباريّة الضياع

طاحس غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

الله يالدنيا

الزبدة موضوعك سامج ولا فيه اي فايدة وحتى طريقة شرحك خايسة والصورة الرمزية بعد مخيسة زي وجهك
وبعدين حتى اليوزر ماله معنى ووجودك انت اصلا بشكل عام ماله فايدة .. وشكرا !

طحينيه معجب بهذه المشاركة .

28-1-2012, 2:50 PM

مشاركة رقم المشاركة : 3

3abed

ضايع من قلب

3abed غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

سبحان الله بديت أقرا الموضوع ويومني وصلت نصه..كان كلام طاحس كله بقلبي وأنا مابعد شفت رده ويوم نزلت لقيت طاحس مختصر لي الحتسي
لكن أنا أختلف معه في اللي قاله عن صورتك الرمزية ونكك ياطح طح. يعني بالله طاحس إذا كان نكه مخيس وش بيطلع نكك
..طعس طاعس طعوس وين طاحس في وزنية الأفعال .. يامحلا نكك ياطح طح إنت وصورتك الرمزية يتهيالي كذا
وأنا أطالع معرفك إنك إنسان أنيق مايهنى لك جو الصباح إلا بكوب قهوة مغربية مع شوية دونات عكس وجه الغبرة
( ياخوفي ياطاحس تطب علي بالتقييم وإنت قايلن "أتمنى ماتتعدا الخطوط الحمرا" ومن هالحتسي اللي نسمعه بالمسلسلات مثل ماسوى بي عين الداب

)

اقتباس:
حقيقةً إكتشفت إن قسم التقنية صار هو قلب المنتدى من عقب ماكانت البشكه هي القلب والكبد والكلاوي وكل شئ بالنسبه للضياع .. صرنا ماعاد نشوف عضو يكتب في البشكه غير منجطل بالطايه سيئ الذكر

.. تشوفه يكتب موضوع في البشكة ويرد على نفسه

<< ماودك يفكّر

النت ياحبيبي بفهومي الوصخ قبعة وقناع تلبسهم وتفصخهم متى ماقدرت تتقن الأدوار أهم شي يكون عندك فكرة توصلها بالطريقة اللي تريحك وتصور المحيط حواليك مهما كان .. والمطاوعة قال فيهم الشافعي : احب الصالحين ولست منهم وأكره من كان تجارته بالمعاصي..غير الخلاف الكبير بيني وبين الشافعي إني أحب العاصين وقد أكاد أكون منهم والله حسيب الكل ..

أما إنت ياطحينية وجودك على الضياع وسنترتك عليه أربع وعشرين ساعة
بدون مشاركة اللهم تحنيط المعرف وعلى هالحال لأسابيع طويلة يفسر لي الإسلوب اللي ماشين عليه كثار من الأعضاء ..
أول بيتهوفن تكلم عن فكرة قراءة نفسيات الأعضاء وشاورني فيها كمخرج لفكرته وماوصلنا لرد يرضي الطرفين ..
وإنت يالي تقرا حتسينا من بعيييد تقوم تطبق الفكره علي وعلى منجطل .. وعسى النتيجة منها رجى للي تبغية هذا هو طاحس زبدها بكل برودة
ودعس شغلك كله بسطرين كأنه يالي يقول لاعاد اشوفك تبثرنا بالتقنية إختصر اللي عندك بدون هذرة
.. لكن الشرهة مو عليه الشرهة على ولد مساعد هالي من هبط مستوى فريقه غدا كل زعيقي نفسية حتى بالمواضيع يطلعون حرتهم على الضعوف أمثالك لكن ماعليك خوف الله مسلط عليهم من هم ألعن منهم نفسيات

..وطبعاً ماننسى نقول : العالمية صعبة قوية

بيض الله وجهك ياطح طح موضوعك كوم وهذاك بكوم وأتعب وأنا أقول .... إلخ لو أقول لك تعال كمله تكمله غدا معروف من كثر ماينصبغ بجدار الردود ، أهم شي إنت فاهمني ياطحينية

بالنسبة للي عنده ايفون فور بدون هذي ( s)

، وعمل جليبريك أكيييييييد يعاني من اللي عانيته مع نفس الجهاز اللي هو ايفون فور بدو هذي (S )

والمشكلة بإختصار .. أول ماتشبك جوالك في الـ usb يقوم الأيتونز يسوي لك مزامنة تلقائية وبالتالي يمسح أي لعبة محملها عن طريق الإنستول فالحل كالتالي
مع إنه يغمرني شعور إني أنا أخر واحد عرفت الحل وكلكم تعرفون لكن من باب ( فذكر إن نفعت الذكرى ) لذلك بكمل كدويتو إضافي مع أخوي وحبيبي طح طح

أول شي تسجل دخولك في الأستور وهي خانة تلقاها فوق شفها

( والله ماني مصدق جالس أشرح ياخي

)

تسجل حسابك الخاص اللي عقدته مع ابل ..وفي حال ماعندك حساب إحذف الأيتونز وإحرق جهازك حبيبي

وبعدها من نفس القائمة اللي هي (إستور=متجر

) وتطنبح تحت تلقا شي اسمه (أثورايز=تصريح

)..وتضغط عليه ، حلو !

إكتب حسابك مرة ثانية وفي حال كان لديك حسابين فهذي الخانة تبي منك نفس الحساب اللي تستخدمه في كثير من الأحيان عند جهازك الأيفون فور اللي بدون هذي (s)

,وتكتب باسووردك ..من عقبها بتشوفة الخانة اللي على يسار (cancel) متاح للضغط فتضغط عليها

ايوة..همن تروح لـ (devices ) .. وكلك يمين وتدحدر لـ (transfer purchases )..والباقي على الأيتونز يعرف شغله بيقوم يعمل نسخة إحتياطية لألعابك وبرامجك اللي منزله من الأنستول بعد ماكان إبن الكلب يحذف لك إياها..وهو شوفوا على حسب الأيتونز ( أتكلم عن أخر إصدار وإذا اللي عندك نسخة مغبرة ضروري تحدثة مثل ماتفضل أخوي طح طح

)..في بعض الأيتوانازات نسخ لكعية مايعمل لك نسخة إحتياطية اللهم إنه يتعهد لك أن لايمس برامجك اللي جايبها بطريقة غير شرعية بأي سوء مثل الأيتونز اللي عندي وفي بعضهم ماتشوف منه إلا : تم فإنت وحظك

فارس و طحينيه و ساندي معجبون بهذه المشاركة .

آخر تعديل 3abed يوم 28-1-2012 في 3:27 PM.

28-1-2012, 2:59 PM

مشاركة رقم المشاركة : 4

Tami

من كباريه الضياع

Tami غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

طيب واللي عنده 3gs يصلح له هالجلبريك ؟

أهنيك ي طحينيه ع هالخطوه الرائعه و شكل حلمك راح يتحقق قريب
و نشوفك في ربوع لندن مثل ما شفنا فارس في استراليا
و تصير واحد هاي كلاس و كول و كيوت < !!

الله ي الدنيا

بالمناسبه شرحك احسن من شرح منجطل <

فارس و طحينيه معجبان بهذه المشاركة .

28-1-2012, 3:38 PM

مشاركة رقم المشاركة : 5

3abed

ضايع من قلب

3abed غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

هههههههه صدقني مافهمت انت وش تقصد وهذا يدل على غبائي .. تقول موضوعك بكوم وهذاك بكوم .. ولو تقول لي تعال كمله تكمله غدا معروف ... الخ .. تراني مافهمت شئ ومدري وش تقصد

إنا لله

..شف الحين لو نزلت أنا مثلاُ تصميم وش تتوقع نوع التعزيز اللي بيجيني ؟

- تصميمك بكوم والوردة بكوم

- أتعب وأنا أقول لك إبداع لايوقف واصل

-جيت بقتبس وكل واحدة تقول الزين عندي لذلك ماراح أقتبس يالدلخة

يعني حتسي المدح صار معروف ولو أنا اقول تعال كمله حالياً ماراح تكمله أقنعتني إنك دلخ

..ماش ماتلقط اللي بين الفواصل

..عموماً الموضوع سوالف ياجماعة خذوا راحتكم خخخخخخخخخخخخخخخخخخخ السلام عليكم

فارس و طحينيه معجبان بهذه المشاركة .

28-1-2012, 3:45 PM

مشاركة رقم المشاركة : 6

هنو

خبيره كمبيوتر

هنو متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

طحينيه

ازينك يوم انّك منوّر قسمي العزيز

جيت أقول إنّ مثبت و مختوم بختم الصفوة إن الله قاله

وراجعة لك بالرّد

فارس و طحينيه معجبان بهذه المشاركة .

توقيع هنو :

سُقيَا حَياةٌ مَقدَمُك :") ،

28-1-2012, 10:57 PM

مشاركة رقم المشاركة : 7

منجطل بالطاية

مراقب مارج

منجطل بالطاية متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

هنو انا انصحتس تقدمين استقالتس لان تامي قدمت استقالته عقب شرحي للجيلبريك لاني بيني وبينتس بثر

.. وبما ان البثارة تعلمته من طحينيه صدقين بيبثرتس الين تطلبين استقالة او نقل اشراف للتشليح

في البداية احب اشكر طاحس لانه طلع حرتي بهالجحلوط طحينية

.. واحب اشكر طحينيه على موضوعه البايخ وشرحه الي انا متاكد لو احد طبقه جاب العيد .. مير احمد ربك محدن معه فور اس والا ايباد والا بينشبون بحلقك ونلقاك زابن وهذي عوايدك .. الخيانة والقلبه عندك بريال وكلنا نذكر يوم تقلب علي وتوقفن ثلاث ايام ايام الحزب المشؤووم

<< من وين طلع هالحزب ذكريات

الصدز كان ودي انزل شرح جيلبريك لاجهزة ابل غير الفور اس والايباد وانا مجهز الشرح وكلش لكن وقفت لاني سويت الجيلبريك لاربعة اجهزة كلهن ما يضبط من اول مرة وتعلق علامة التفاحة وحلها سهل لكن يبغى له شرح فيديو وعسى توصل الفكرة

.. لذلك قلت اكيد بيجي واحد مثل طحينية يتوجه اتجاه تقني ويعلمكم طريقة الجيلبريك

.. صدز انه سفّل بي بمقدمة الموضوع بس هذا ما يمنع اني اعترف ان توجه الرجال واضح وصحيح بعيداً ان صورته الرمزية خايسه مثل وجهه

فارس و طحينيه معجبان بهذه المشاركة .

توقيع منجطل بالطاية :

كثيرة هي عقبات الدنيا كما كثرة تحويلات الرياض

كل ما عليك تبحث عن درب آخر وتواصل حياتك

----------------

30-1-2012, 10:43 PM

مشاركة رقم المشاركة : 8

ساندي

إداريه متقاعده

ساندي غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

سبحان اللي يضع سره بأضعف خلقه بالأمس كنت تسألني عن برامج كانت تستوطن جهازك وأنت ماتدري !

واليوم تشرح الجليبريك الأخير صدقني أنت فتنه ياطحينيه مثلي كذا بالضبط

من جد أهنيك على هالتقدم الذهني قبل التقني

الحمد لله ركبت الجليبريك على ايباد 2 ونجحت

سبحان الله على ان تركيب الايباد 2 والايفون 4 اس أصعب بسد الثغرات من الاجهزه الباقيه الا اني لاحظت عند عمل جليبريكات للايباد 2 مهنا اسهل منهن مايحتاج لا تدخل بوضع الديف مود ولا هم يحزنون مثل الباقين

يمال العافيه يامخ مخ

دايم ادهن سير مُخيخك بزيت عشان يشتغل لنا صح مثل كذا

ابدعت

طحينيه معجب بهذه المشاركة .

توقيع ساندي :

تم التوقيع :: ܔܓ܏ܛ

31-1-2012, 12:15 AM

مشاركة رقم المشاركة : 9

منجطل بالطاية

مراقب مارج

منجطل بالطاية متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

عن اذنك يا طحينيه برد على اللي فوقي

انا اعشق الطنزه واحب التسفيل بالغير بس اهم شرط عندي يكون على سنع يعني لا تسفل بغيرك وانت كمخه

.. يا بيكسل الصدز اني فقعت ضحك على كلامتس لان احلا شي ان واحد يهزأك وبنفس الوقت يصير هو غلطان هنا تحس بنشوة الانتصار

اقتباس:

مايحتاج لا تدخل بوضع الديف مود ولا هم يحزنون مثل الباقين

صحيح ما يحتاج وضع الديف مود

.. بس ما الومتس دايم عندتس مشاكل بالانقلش وقوقل شيرم اكبر شاهد على هالمشكله

.. عدلي الرد وحطي دي اف يو مود (DFU) عشان نحس انتس تطقطقين علينا

اهنيك اخي طحينية على الشرح الراقي الخالي من الديف مود

.. واحلا شي اني تابعت شرحك بقوقل شيرم

فارس و طحينيه معجبان بهذه المشاركة .

توقيع منجطل بالطاية :

كثيرة هي عقبات الدنيا كما كثرة تحويلات الرياض

كل ما عليك تبحث عن درب آخر وتواصل حياتك

----------------

31-1-2012, 1:31 AM

مشاركة رقم المشاركة : 10

ساندي

إداريه متقاعده

ساندي غير متواجد حالياً

الأوسمة

رد: شرح: عمل جيلبريك للآيفون فور إس iPhone 4S | و الآيباد 2 iPad

مهوب عيب انك تطيح وجهي قدام الناس وتسفل بي لأن من حينه دلاختي لاحسه الأرض خلقه وهالشي مُعترف فيه دوليا وضياعياً

بس انا اشره عليك انك معطيني أمل أتعدل بس يكفي انكم فاهميني

وترى مهوب بس الديف مود حتى الريكفوري مود له نصيب هههههه

عاد مانقدر نقول عنك شي انت مؤسس الجليبريك الأول

.
.

من أهم أدوات السيديا ..

WhatsPad لتفعيل الواتس أب على الايباد
FullForce لمليء شاشة برامج الايفون على الايباد
iFile لتصفح ملفات النظام
CyDelete لحذف برامج السيديا مباشره من الصفحه الرئيسية
Belfry لاضافة الساعة والحاسبة واحوال الطقس والبوصلة على الايباد

طحينيه معجب بهذه المشاركة .

توقيع ساندي :

تم التوقيع :: ܔܓ܏ܛ

صفحة 1 من 2

مواقع النشر (المفضلة)

« موضوع استفسارات iphone / ipod/ ipad، نسعد بخدمتكم ..! | اي استفساار عن الجلكسي »

الذين يشاهدون محتوى الموضوع الآن : 2 ( الأعضاء 0 والزوار 2)

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الساعة الآن بتوقيت الرياض : 9:29 PM

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25