تم تسجيلنا بالمدرسة بطريقتنا الخاصه ( واضح ان اللي كاتب القصة توهق بالطريقة قال يكفي طريقتنا الخاصه ) .. قبل نداوم كنا بنلبس الباروكات عشان تغطي صنادحنا وصلعاتنا تفاجئت ان دحيم شاري باروكه شقرا .. المهم رحنا اول يوم مع ابونا مفلح واحد من الشلة قلنا له خلك ابونا تودينا وتجيبنا لعل الرجال صدق نفسه ويلبس شماغ وعقال وفروه يوم سالناه ليه الفروه قال عشان يحسبون لكم الف حساب اذا شافوا ابوكم لابس بشت
نزلنا وبقى امامنا اربع خطوات ونص وندخل المدرسة وكل واحد طاق العباية وميتن حر ويحترق عقب الحلاوه .. فجاة دحيم يركض ورا مفلح ويوقفه ويركب معه شوي ورجع يوم جاء سالته خير ان شاء الله قال لا بس همانا تاخرنا عن المدرسة شلت الجزمات بيديني ولبست الزبيرية ومع الفهاوة نزلت للمدرسة بالزبيريه .. بدينا نمشي بخطواتنا ونقترب من مستقبلنا الجديد وعالمنا المجهول وانا اسال دحيم ياخي انا صوتي نشاز قالي دحيم حرااام عليتس وربي صوتس حلو بس انتي حاقره نفسك وربي مليون واحد يتمنى يسمع صوتس قبل ينام .. كان يقولي هالكلام وهو يوطي رجولي يعني خلاص لا تفضحنا اقلب بنت
على مدخل المدرسة قلت لدحيم اسمع انا اسمي ليان وانت اسمك مها .. دخلنا وانتهى الطابور ورحنا لفصولنا وانا اتمتم بكلمات لمها واقولها يا ربيييه ليه كل الناس يناظرون فيني .. ردت علي مها وهي تقول ليان ما عليك فيهم هذولي معجبات او غيرانات من وجهك يالصاروخ ( من قال صاروخ تحس فيه بقايا مطعسه )
بدينا اول حصة مع ابله موضي وانا اتحقرص مكاني شب علي وجهي وسيقاني ويديني عقب الحلاوة واشوف مها مطلعه لسانها عقب ما شلنا الشعر منه .. كانت تشرح الابلا وكل شوي تناظر بمها فجاة قطعت الشرح وقالت وش فيك مطلعه لسانك .. تجمعت الدمعه في عيون مها وبدات تشاهق وتقول: اسفه يا ابلا والله مو قصدي مو بس بدخله الا ببلعه بس بلييييز هذا مستقبلي ابغى اكون خـ .. خريجة من الجامعه ( توهق وبغى يقول خياطه وصرفها بخريجه ) .. ردت ابلا موضي يا حياااتي انتي اجلسي يا قلبي ما راح اوقف عقبة امام مستقبلك .. عدت السالفة على خير وعلى آخر الحصة مها ترمي علي ورقة مكتوب فيها "يمديك ع التشبيك خليتها تقولي يا حياتي ويا قلبي صدز انه عجوز وجبهتها متسفطه بس ياخي خقيت" .. شقيت الورقة عشان اخفي اي اثر للجريمة
مشت الامور وطلعنا فسحه وانا جالس ادور الحمامات ومها تقولي دور لك اي مكان صاد وطير الشراب مب لازم حمام .. رديت عليه وعععع يا مقرفه وش قالوا لك المهم انتي روحي تفسحي وانا بدور لي حمام .. رحت الحمام وانا اتفرج على منظر البنات اللي مهستره وتنكت وحوله 3 فاقعين ضحك واللي ماسكه جوالها ومجتمعين حولها 7 وتكلم ومشغله السبيكر وهي تكشخ عندهم" حبيبي ما اشتقت لي ويرد عليها وانا بعد اشتقت لـ .. الله يلعن شكلك يابن الكلب ماتشوف .. معليش حبيبتي بس هذا واحد حدني وانا رايح للدوام وعصبت " .. مشيت وخليتهم لاني الصدز حامت تسبدي واستمريت بالمشي ولقيت وحده تصيح وجمبه وحده تهديها وبيني وبينك طقتن النخوه وقلت بفزع اشوف وش عندها .. رحت لمهم والبنت تشاهق من الصياح وقطيت معهم هاي صبايا انا ليان قطعت قلبي البنت ممكن اعرف وش السالفة ممكن اقدر اساعدكم .. ترد علي صديقتها اللي تهديها يا حراااام هذي صديقتي تبكي عشان امها امس ما شرت لها شنطة اعجبتها في السوق .. انا كنت اناظر وفجاة بدت صديقتها تصيح معها وفجاة طبت بحضني وهي تصيح وتقول ليه كسر الخواطر لييييه .. مادري ليش بذيك اللحظة صحت معهم وانا اصيح اقول يا ربيه ليه القسوة وش يضرها 50 ريال على شنطة صدق انها بايخه فجاة دفتني وقالت يالقروية وش خمسين ريال يله انقلعي هناك لا اشوفك مقربه لنا يا مقرفه .. مشيت من عندهم و300 علامة استفهام فوق راسي ليش قروي لهالدرجة 50 ريال كثير على شنطة .. استمريت في المشي الين وصلت الحمام وجلست هناك نص ساعه لان بيني وبينك بلشت بالتفصيخ
طلعت من الحمام ورحت ادور مها ولقيتها جالسة ومعها ثنتين رحت عندهم سلمت وجلست وبديت استمع لسواليف مها على البنات .. مها تقول: تخيييلوا يا بنات مرة كنت جالسة اكنس الملحق وصارت لي شغله جوا البيت رحت خلصتها ورجعت للملحق اكمل كنس وانا ارقص واغني والعب بشعري بس ما كان اشقر مثل كذا كنت سابغته خسلات بنيّه المهم وانا بوسط الكنس فجاة صوت رجال يتنحنح يمممه انا خفت صار صديق اخوي من دخلت بالمكنسه كان موجود ما انتبهت له ياربيه كان حلو وغمازات يهببببل شكله .. ردوا البنتين اللي معه يا حظظظظظك مالت علينا حنا اذا ناظرنا واحد بالسوق صد عنا .. اكملت مها تسذبها وهي تقول تخيلوا يا بنات بعدها بشهر جاء يخطبني بس انا رفضت .. بصوت واحد البنات ليييييه يا غبيييه حرام عليك .. قبل ان يرد عليهم مسكته وسحبته على جمب وانا اقوله ياخي شف لي صرفة تراي ساكت مقدر اتكلم صوتي نشاااز خلاص النعومة راحت الصدز قبل شوي سويت مجهود صياح وخمتني بنت ( ما همه الا البنت هالسربوت ) .. قالت لي مها ماعليك انتي تعالي معي واضبطك .. رجعوا للبنات وقالت مها احب اعرفكم على ليان وهذي ريم وهذي شوق .. جلسوا وقالت ريم كملي السالفة يا مها ليه رفضتي .. ردت مها: امممممم بسراحه رفضت لعيون حبيبتي ليان .. تعرفون الموقف الصدمه اللي تبدا ترومش منتب مستوعب كل اللي بالجلسة رومشوا شوي وشهقة جماعية وبصوت واحد رافضه واحد حلو عشان هالمخيسه .. لا شعورياَ عضيت لساني ناوي اقوم احوسها متعود على شغل مدارس العيال منول قامت معي مها وخمتني وهي تقول يا بعد قلبي انتي والله ادري انك حاقده علي بعد هالسالفة وانك ما ترضين شباب من حثالة المجتمع يشوف جسمي الخقق .. رديت بنبرة حزينة قهر يا مها حرام عليك انا حبيتك بكل ما فيني تسوين فيني كذا تخلين واحد مقرف يشوف جسمك صدق اني احبك بس انا الحين مجروحه .. كنت اقول هالكلام وعيني على ريم وشوق وهن يناظرن بخقه وخانقتهن العبره من هالموقف فقلت استغل الموقف وبديت اصيح وانهار من قوة الصياح واقول بصوت خفيف لمها يا حيوان قلهم يخموني .. التفتت مها للبنات وقالت ساعدوني عليها ضموها تراها منهاره الحين يا حرام .. قربوا البنات وضمه جماعيه وبحركة خطافيه عطيت مها ركبه يعني انقلعي خلين استانس وراحت مها تتلوى من الم الركبه .. رن جرس الفسحة اعلاناً عن انتهاء الفسحة وقالت ريم يا حلوك يا ليان بويه محترمه حتى ما تجراتي وقلتي بوسيني .. بهذه اللحظه انقلب وجهي وبديت استوعب مدى دلاختي واني ما استغليت هالفرصة وبديت اعاتب ابليس وانا اقول وينك بهالموقف بس شلون ما ذكرتن بالبوسه
مشينا وحنا نمسح دموعنا بكل رقة متجهين للفصل عاد مرت من جمبنا وحده دبيّه كانت تركض ورا بنت ماخذه سندويش الفسحه منها وصقعتني بالغلط وطحت .. بعد ما طحت فجاة سمعت صرخات البنات ويراكضون حولي واللي تقول يا ربيييه كيف دخل ذا عندنا واللي تقول واعيباه لا يكون مصورن ( مايقصد سالفة جامعة الاميرة نوره ابد ) واللي شاطفتن وهي تضحك وتقول هذا اللي يعايرونه بالبلاك بيري ويقولون ابو سروال وفنيله .. واسمع مها تصااارخ وتقول يا مفترين يا حقرورين هذي حبيبتي ليان بويه وتحبني وانا احبها فديت قلبها لابسة سروال سنة تحت المريول عشان تغريني والا هي مو ولد مثلها مثلكم بنت نعومه بس محد يصبر عند جمالي وحبتني غصب
هذا اخر شي سمعته لاني بيني وبينك صحيت وانا احس اني بجمس اكتشفت انه جمس الهيئه حتى ما شاورونا علطول ودونا لسجن النساء وحنا نقنعهم ترانا رجال وعيّوا يقتنعون بس اشوا اقتنعوا بالاخير بس مب لازم اقول انهم فحصونا وجابونا عندكم وهذي السالفة