مساكم الله بالخير جميع
شلونكم شخباركم عساكم تزقحون وتطمرون العرفج ؟

أول شيء قبل لاتدحدر الله لايهينك وتشوف الصور ومقاطع الفيديو تعال أبيك بكلمة رأس ( وجه يتلفت يمين ويسار ) .. وش عندك داخل الموضوع بالمقوصر والعلاقي ، شايف درجة الحرارة فوق كم ؟ لا جاء نص الموضوع وجمدت خل الهياط ينفعك
<< هذا لاقالوا لك توهق بالمقدمه

رحلة الشتاء إلى عاصمة المغامرات في العالم
رحلة الثلوج في جبال الألب في نيوزلندا الخضراء والبيضاء في آن واحد

تذكره الرحله :
مدينة المغادره : سيدني ( أستراليا )
مدينة الوصول : كوينز تاون ( نيوزلندا ) مروراً بالعاصمه أوكلاند
مدة الرحله الجوية : سبع ساعات
فتره الإقامة : عشرة أيام + عشر ساعات << حاسب الإنتظارات بذمه



قبل شهر ونص تقريباً في عز البرد وزمهرير الشتاء وبآخر إسبوع من إجازتي الشتوية ، قررت بكامل قواي العقليه والماليه قضاء رحلة ثلجيه انا وواحد من زملاء المهنة قلت ابعد عن الضوضاء والصخب والمجون (منتب عاقل ياللي ساكن بـ لاس فيغاس الحين ) .. وكان هدف الرحله إني اروح لأبعد نقطة عن بيتنا في الرياض فجبت الخريطه مع شريط المتر وقعدت أمتّر بين الرياض وباقي مدن العالم ، فطلعت في النهاية بمدينتين تعتبر تقريباً أبعد الأماكن المأهوله عن الرياض .. الأولى تقع في بيرو في أمريكا الجنوبية .. قلت لا وش يوديني بيرو يصمخونا بأصوات بواري سياكلهم الحين ( يسمع بالبيرو ) .. اما الخيار الثاني فكان بلدة نيوزلنديه صغيرة في أقصى الجنوب من جزيرة نيوزلندا الخضراء وأقرب نقطة مأهوله للقطب الجنوبي اسمها ( كوينز تاون ) فقلت بس هذا هو اللي نبيه أبعد مدينه في العالم عن الرياض (الله من زين الطموح الحين) .. كوينز تاون أو ( بلدة الملكات ) .. بلدة صغيرة تقع في بلاد الكيوي نيوزلندا وعدد سكانها مايتجاوزون الـ 15 ألف نسمة تقريباً .. درجات الحرارة في بعض الليالي توصل لأقل من عشرة تحت الصفر لكن يميزها الهدوء والسكينه والطمأنينه والأهم من هذا كله المغامرات والنشاطات الثلجيه مثل التزلج على الجليد والقفز بالمضلات والبنجي جمبنق وطيران المنطاد وغيرها الكثير من المغامرات اللي جربت ربعها وثلاثه أرباعها وزوّها عني .. وبالمناسبة هي نفسها المدينه اللي صوروا فيها مشاهد أفلام ( ملك الخواتم The Lord of The Rings ) بكل أجزائه الثلاثه طبعاً .. تلقب هالمدينه بـ ( عاصمة المغامرات في العالم ) مع إني صراحه ماشفت مغامرات تسوى لكن الظاهر مثل ماقلت شكلهم وزّوها عني مايبوني أغامر معهم الله يهديهم بس .. الوكاد ان هالبلده تستاهل صراحه الزياره والعنوه ومشقه السفر ولطعات الإنتظار في المطارات الدوليه .. لإن محاتسيكم انلطع في مطار كيونزتاون خمس ساعات بسبب تأجيل الرحله وفي نفس اليوم انتظر خمس ساعات ثانيه في مطار سيدني لنفس السبب !! يازين خطوطنا السعوديه بس أحلى شعار ممكن يستخدمه الملحم الآن عشان يسترجع سمعة السعوديه عقب سالفه لحم الحمير هو انه يحط الشعار ( من طلع من داره .. قل مقدراه ) .. والله الطيران الإقتصادي ماودك تركبه أبد .. طلبت في الطياره شويه نقرشه ثم قالوا لي ادفع قلت للأسف مامعي كاش .. قالوا طيب دبّر نفسك عطنا بطاقة اكتب لنا شيك اي شيء .. المهم إني عطيتهم البطاقه بس للأسف طلعت ماتشتغل في الجو مع إن أبراجها فل ماشاء الله .. حتى الماستر كارد برضوه ماضبطت (بيني وبينكم كانت فاضيه لإنها تقليد مهيب أصليه ) .. عاد آخرتها قلت للمضيفه خلاص تدرين شلون بس ازهمي على الكابتن وخليه يصفط عند أقرب محطه عشان اصرف لكم المقسوم .. مير تجي وتسحب الصحن وهي تقول بنبرة إستحقار آف نيفر سين سم ون لايك يو .. وهنا أبو نواس يكشر عن أنيابه ويطلع لها الشيكات السياحيه ويومي بها وماأمدها تشم ريحه الشيك إلا وترجع الصحن على الطاوله قلت لا خلاص خلي عيشتكم تنفعكم ومير صدقت نفسي وبغيت اقول ستوووب ياكابتن نزلني << متعود يركب باصات

المهم بس خلوكم من الحتسي اللي مالوش لازمه فوق وخلونا ندحدر سوا على الصور والفيديوهات .. بسم الله على بركة الله ..

البداية كالعاده لازم تكون من دريشه الطياره .. وهذي لقطة جوية من فوق خمسميه ألف كراع



وهذي لقطة جوية أخرى لمنظر جبال الألب النيوزلنديه قبل الهبوط بدقائق




الفصول الأربعه في هالبلده اجتمعت في وقت واحد .. يعني ممكن تشوف على جهتك اليمين جبل مغطى بالثلوج ومن برودة المنظر تبدأ تحس بضروسك تتطاق في بعضها ثم تلتفت لليسار شوي وتشوف الأنهار والوديان والسهول وماودك يوم تشوف المنظر إلا تنسى البرد وترمي خلاقينك على جنب ثم تقعد تطامر مثل مطامر بيتر مابين سهل وجبل



صورة لبحيرة ( واتاكاينبو ) أكبر وأشهر بحيرة في نيوزلندا طبعاً هالبحيرة لولا الله ثم هالثلج اللي عندهم كان ماصارت علم على رأسه نار ، تذوب الثلوج وتتجمع المياه وتكونت هالبحيرة على هالحال .. عندنا أتوقع بتجي بحيرة ويسكي من العرق




صورة زوم لقمة جبل متوشحه بالبياض ومثل الواضح في الصوره الظاهر إني جيتهم بدري قبل مايبدأ موسم الثلوج عندهم بما ان علامات الجبل واضحة وممكن تعرف انه جبل بالعين المجردة




صورة لغرفتي الكوخيه من الخارج المفروض اصور لكم من الداخل للخارج موب العكس لكن الله يبلانا معكسوين ومتعوكس تفكيرنا وين مارحنا
عاد ما يحتاج أشرح وأمدح بها ، من تشوفونها اصلاً تحسون بالدفئ والراحة





هالسياره السبورت على حالها من اول يوم طبيت فيه الفندق إلين آخر يوم لدرجة اني شكيت إنهم موقفنيها وعارضينها للبيع ماخليتها بخاطركم رحت أسأل عنها أجودي ساكن بالفندق ، في مامعنى كلامه إن هالتوقيفة الرزة عندهم مثل نصب الموتر عندنا





صورة لمدخل الفندق الكوخي الهادئ الجميل الرائع المميز الرهيب .. اسمه ( كورونيت بيك هوتيل ) فندق اوذيف وحليو وأسعاره مهب غاليه بالحيل .. بعيد عن وسط المدينه شوي لكن ميزته انه وسط جبال الألب يعني ابد لامن طقت براسك تاخذ لك شوط تزلج شف لك اقرب جبل وارقه ثم تعال مدحدر أنت وزلاجتك وأنت وحظك عاد أحيان تحس إنك طاره وتنطل يمين يسار وأحيان ثانيه تبنّط في اقرب شجره .. العيب الوحيد في الفندق هو السيراميك الجليدي اللي قدام المدخل .. مستحيل تدخل وتطلع بسلام من عند باب الفندق لازم تتزحلق وتتمرقص برجلك ويضيع البريستيج ولايردك إلا الماصوره البيضاء الصغيره اللي في الصوره اوتلقى نفسك محتضن الأرض بصعرورة بنص جبهتك





احد نشاطاتي المفضله مسيان هو التزلج بالبولنق .. كسرنا روس النيوزلندين بهاللعبه وعطوني حزام بطل العالم في التيكوندو .. صحيح مالها دخل بس يقولون مالك إلا هالحزام نساه سائح ياباني عندنا ومالقينا شيء يصرفك عنا إلا هو فـ خذه الله لايهينك وضف وجهك خلنا نلعب على راحتنا صاير مثل الهلال دايم تفوز علينا



الرحله كان معي ثلاثه صديقات .. في الصوره تحت بتشوفون ثنتين من هالصديقات .. الأولى عدسه وايد انجل 10 - 22 والثانيه تيلي فوتو 70 - 300 من فئة L البطرانه .. أغلب الصور اللي تشوفونها كانت من هالعدستين



كوينزتاون فيها ثلاث جبال رئيسية للتزلج ( كاردرونا - كورونيت بيك - ريماركبلز ) .. أول يوم رحت للكاردرونا ( منتجع الألب الجليدي ) وتقريباً يعتبر أقل الجبال الثلاثه إرتفاع .. دخلنا وحنا مابنا إلا العافيه طلعنا منه بأقل الإصابات الممكنه ( شعر في الكتف - التواء أعصاب في الرقبه - فك في اليد - كسر في الترقوه ... إلخ )





منظر من أعلى الجبل




هنا يتم التزلج والتفحيط بالدباب الثلجي .. بالنسبة للتزلج فللمعلومية للي يسمعون بالتزلج مثلي قبل .. التزلج نوعين الأول يسمونه ( سكي skiing) يعني زلاجتين وعصاتين وانت وشطارتك عاد .. تعتمد على المرونه والتوازن وسرعه البديهه .. أما الثاني فاسمه ( سنو بوردنق snow boarding) وهذا زلاجه كبيره قطعه وحده وتعتمد على حاجتين الأولى التوازن والثانيه سرعة البديهة .. بتقولون وش دخل سرعة البديهة في الثنتين أبقولكم مالها دخل بس مثل ماقلت لكم فوق فرصه أسوي فيها فاهم عليكم





ومن هنا بدأ أبو نواس بمخر عباب الجليد ولسان حاله يقول صفطوا على جنب جاكم أفضل واحد في العالم يتزلج برجل وحده والرجل الثانيه يرفعها فوق من قو الطنخه اللي براسه بس بالله تعالوا شوي ، ركزوا على رجلين ذا المملوح ماتحسون انه بحل بعمره هو ورجلينه الثقيلة ؟ عندي يقين داخلي انه تعصر لين قدر يرفع رجل ويقدم الرجل الثانية











هذا اللي احترت صراحه وش نسميه بالعربي .. يعني لاهوب تلفريك ولاهوب كيبل ولاهوب مصعد ولا لفت ولا حتى اصنصير (<< كلها واحد ياثور ) .. لكن يكفي الصورة تعرفون وش اقصد .. طبعاً محاتسيكم بحكم طبيعتي الصحراويه مفترض آخذ مع البزران اللي تحت حصه تدريبيه في التزلج ومدتها ساعتين لكن من العجله اللي فيني طمرت مع هاللي طالعين فوق على أساس إن التدريب بيكون فوق وللأسف طلعوا اللي فوق مايقبلون بالدروج امثالي ، كان للمحترفين فقط وبما اني اسمع بالاحتراف قالوا لي الله لا يهينك انزل لاخوياك الوراعين تدرب معهم محلك مهوب فوق طال عمرك ..رحنا ندور منزال ننزل معه ماش مافيه ، يوم سألنا خوينا قال : انت وشطارتك بتنزل خذ زلاجاتك واشقح بهالثلج ، عاد مايحتاج تفاصيل وش لكم بطول السالفة خويي رقع له عامود كهرب وانا جيتكم مجلعد مع طريق كله طلعات ونزلات ومطاب





ذولا طيبين الذكر اخوياي فلذة كبدي اللي تغيّبت عن التدريب معهم ولسان حالهم يقول : فكة منه ماودنا نضاعف الساعتين اربع عشان نفهمه شلون يوقف بالزلاجة









في فتره مابين الشوطين حاولت اكتب بالزلاجه اسم الضياع على الثلج .. لكن للأسف المحاوله فاشله وطلع كأنه خط بنقالي



لو سمحتوا حاولوا تناظرون الجانب الايمن بالصورة ، هذا سلمكم الله مثل الدباب عندنا ، بس عاد
هم حاطينه للطوارئ والإسعافات حاولنا فيهم كم مره نبي نركبه ، ياجماعة حنا دروج ركبونا بس
واكسبوا اجر < يحاول يشتت انتباهكم عن الاشقر









هذا هو السكي ( Ski ) .. ويعتبر أصعب من النوع الثاني لإنه يحتاج تحكم برجلين ويدين .. عكس السنو بوردنق راس مالها رجل وحده وإيدينك حطها في جيوبك ولو تلاحظ معي شوية بتشوف حتى الحريم من الطنخة مايبي لهم الا كراث وشاهي ويقلبونها مسيار ضحاوي












بعد نهار تزلج مرهق ومليئ بالكسور والفلقات أخذت لي جوله في وسط البلده الهادئة حتى هواها
هادي ونظيف ، تشك انك تمشي بشارع اللي المفروض مزعج بواري وناس يرفعون للمسجل حركات
اللي توهم طافرين بموتر ويمرون بمرحلة قاحلة








هنا طال عمركم اللوبي اللي هو بهو الفندق ، ميزته غير هدوئة وروقانه تحس انك ساكن بشقة زكرت لدرجة انك لو تمسح نخاريرك بفنيلة خويك ماعندك مشكلة عندكم مثلاً خوينا هاللي يمشي حافي ماعليه الا فنيتله العلاقي وأمر الله من سعه عندكم بعد زميل المهنة ذا الطعس اللي اول ماشاف الضو خذ ياخمخمه والله من البرد اللي مصافقن ضلوعه في بعض




هذي أول محاوله لي لتصوير القمر لو كان قمر فعلاً ، أشك إنه ملعوب علي شافوني درج
قالوا خل نلعب عليه نوريه زحل والا اي مذنب ونقول ذا القمر يالله صوّر بس وفكنا

قمر نيوزلندا



الفندق من الجهة الثانية في الصباح الباكر
أدري بتقولون وش هالصورة اللي مالها معنى ، لا ياحبيبي انت واياه المعنى في بطن الشاعر
هالصورة عشان اوهم اللي قاعدين اني اصور والا الدعوة كلها لقافة ودي ادري وش مقعدهم فيذا
بس ، يعني ضاقت الأماكن







من الأشياء اللي لاحظتها في ( كوينز تاون ) إن تقاطعات الشوارع عندهم دوارات .. لو تلف البلده كلها ماتحصل إلا إشارة أو إشارتين بالكثير الباقي كله دوارات << معلومه مهمه صراحه
عاد أنتم دققوا بذا الداور ، مدري لاعبه عليهم الحكومة وحاطة كفر سيكل وقايله هذا دوار والا وش وضعهم بالضبط



هذي صوره من اعلى جبل يطل على البلده مباشره ، وبتلاحظون مسارات خاصه بسيارات صغيره يسمونها ( سكاي لاين لوج ) .. هالسيارات ودكم من يجيبها للرياض ويسحب مواترهم كلها ، وابن امك خل نشوفك مزورق بموترك ومزعجنا
الهواء البارد .. البحيرة الزرقاء .. شجر الصنوبر .. وأخيراً أعلى جبل يكتسيه البياض .. إحساس ثاني << لا ياشيخ





سبحان الله الانسان احياناً من كثر ماهو ذكي ومبدع تجيه فصلات لدينمو الذكاء ويصير عالة على اللي معه جيت انا وزميل المهنة لهالمطعم ناوين نبلع صح .. الجوع ضاربنا ضربة خلتنا نختار من هالمينيو وننسى اعمارنا .. وبكل بجاحة محاتسيكم واقف بالسرا يطلب وهو مامعه ولا قرش كاش دام البطاقة مدقرة من يومها بالطيارة سألت خويي قال معي هلالات ونقعد نجمع ونعد فيهن ونحاول يمين يسار لين وصلنا لسعر هاللي على الطاولة بس والباقي رجعناه طبعاً



تشوفون غيمة مثل ما اشوف ؟ لأني بصراحة شاك ان العدسة وقتها وصخة والا وش جاب الغيوم تحت < هالدرج ناسي هو شاف غيوم والا





أيوه هنا الفصول الأربعة كلها واضحة بصورة وحده .. شوفوا الجبل البعيد وفصل الشتاء .. والشجر حات فصل الخريف .. والربيع عاد مايحتاج من خضرتهم .. إلا الصيف عاد يقولون خليناه كله لكم يأهل السعودية



هنا طالع الصباح أحمّي الموتر << رايق





هنا ركبنا الجندولا ( التلفريك ) لأعلى الجبل المطل على البلده



لقطة من فوق للبلده وترا هذي هي حدود البلده .. زي ماهو مبيّن بلده صغيره








ياطير يامسافر له .. وصّل له هذا الكلام
ميّت حبيبك قلّ له .. والليل أبد ماينام
عشرتنا ماناسيها .. كل يوم أفكر بيها
والعشره ماتهون إلا على ابن الحرام !









أدري اني مصور محترف وفنان وهالشيء مايختلف عليه إثنان .. بس لاتشكون اني مدخلها الفوتوشوب يرحم امكم كل شيء ولا
تخربون سمعتي الاحترافية





هالبحيره مسميّها شخصياً ( بحيره البط ) من كثر البطابيط اللي فيها ماشاء الله <<- بطابيط أجل





أخيراً لقيت مطعم ناندوز هناك أكلهم حلال وأنواع الكبسة والرز وأتوقع لو تطلب مطفح ما تعوق معهم يجيبونه لك سبق وفتح هالمطعم فرع في السعودية لكن حسب ماسمعت قفلّ .. الظاهر ما مشى سوقه مع مطاعم المندي والبخاري



أخيراً صار معنا قروش ودبسنا بالنعمة



هذي صورة تخليداً للذكرى السئية لابوها قروش عليها صورة حرمة ومنكدة علينا .. العجوز الشمطاء الملكة اليزابيث الثانية رازتن خشتها في الدولار النيوزلندي .. والظاهر ماخلت عملة في العالم مارزت خشتها فيها ماباقي إلا العم سام والملك عبدالعزيز تستحل صورهم في أمهات 500





هالشبيبه شفتهم ماسكين خريطه ويبحثون عن كنز مخفي في وسط المدينه وهاتك يامطامر ومراكص بين الشوارع والأزقه .. طبعاً قعدت اطامر واهرول معاهم بحجة إني أصورهم وإلا في نيتي أتقاسم معهم الكنز لاحصلوه << الذيب مايهرول عبث












الفندق بين جبال من الثلوج



















تدحدر هي وأختها الصغيره بهالزلاجات وفالينها لين إختل توازنها وخلت الصغيره تحب الثلج وهي متكوكسة






موتري ماغيره اللي شاركت بصورته في فعاليه التصوير







موتر للتخميس على كيف كيفكم دباب بحري يخمس فيك ويدرفت بالنهر درفته بنت كلب << تفكير مراهقين



























زميل المهنة من جديد يسوي نفسه موب خايف وهو قامط من الحصان لايجفل به

الحصان واتسبيري ... من الصدف كان عيد ميلاده من اليوم الثاني










حللنا عدسه الزوم وصورنا حتى الطيارات في الجو

خاف الحسد من أهلك .. يالماشي أنت بـ مهلك
زلزال يخرب بيتك .. كيك وحلاوه بـ شكلك
وزنك بخف الريشه .. ورقصك خبيتي بيشه
وطعمك معسل شيشه .. كيك وحلاوه بـ شكلك

إسحبوا على الفريان شوي شفتوا الحشائش الصفراء الصغيرة ؟ هذي هي حشائش السافانا بشحمها ولحمها .. هي نفسها اللي طول عمرنا نذاكرها بالجغرافيا ولا ندري وش هي من لحية



















هذي سلمكم الله ديرة ثانيه مسكت لها خط مية كيلو تقريباً والحمد لله طلعت تسوى المشوار :



صور من القريه أول ماوصلنا لها







موتري رفيق دربي << جحد خويه











الضياع مره ثانية بس هالمره بأصابعي الكريمة بيني وبينكم يالله يالله عرفت أكتبه من زمان عن العربي أتوقع يبي لي اذا رجعت أدخل تأهيل لغة عربية من جديد





هنا معقل البنجي جمبنق في العالم .. للي وده يجرب شعور الانتحار بس خايف من صدمة السقوط



صورة زووم بعد القفز



مصنع الجبن



مصنع الخمر









صور من داخل أحد المتاحف









صورة بورتريه لعيون منجطل



هنا الباص اللي يوديك لإسطبلات الخيول برا البلده وهناك يمرون بك على أغلب المواقع اللي صوروا فيها سلسلة أفلام ( ملك الخواتم )









رجل الثلج مرسم .. عاد مالقيت أصور إلا أخيس وأفشل رجل ثلج شفته هناك







غزلان الوعل



















وعشان مايزعل علينا أبو سليمان .. هذي صورة بالوضع الإنبطاحي على الثلوج من فوق الجبل تخليداً لذكراه










هذا بعض مما كان في الرحلة فاعذرونا على الحوسه في ترتيب الصور وعلى السماجه اللي زايده حبتين هاليومين .. الرحله عشر أيام طلعت منها بأكثر من 2000 صورة ومقطع فيديو فقمت أحوس بالصور ولخبطت المجلدات مع بعضها لين تقروشت فقلت يلعن أمها حاله ماتسوى علينا هالقروشه فقررت في الأخير أخم لكم بعض الصور من هالمجلدات لدرجة إن بعض الصور عليها ختم وبعضها بدون .. وإحتمال أخربها وأنزل جزء ثاني بعدين باقي 1000 صوره لازم نحللهن بموضوع .. عموماً اتمنى ان شاء الله إنها تجوز لكم وتوصل لكم ولو صورة كامله عن الرحله فالعذر والسموحه على القصور فإن كان هناك من صواب فمن الله ، وان كان من خطأ فمن نفسي والشيطان