تكمله :
ونشووووووف الحرم وحمام الحرم ويالبى الحرم اللي رحت له ولا شفت الكعبه !!
طبعاً عشان بس اسرد لكم الحاله وقتها ... من 11 الصبح ماطب ثمنا شي ومن 11 الصبح وحنا نمشي ووصلنا للحرم الساعه اربع ... ونبي نرقا للسطح نطوف والعاده ياخذ الشوط بالسطح 20 دقيقه ..
مشينا ومشينا ونناظر الباب وعيوننا تسذا .. وش هالزحمه !!! وش ذااااا الزحممممه !!! ومير امي تقول دامنا وصلنا خل نطوف .. يمه يرحم امتس انتي وابوي وش قو القلب اللي فيكم زحممممه مايمدي ! هم : لا ابد بيسرها ربي امشي بس شوفي شوفي الزحمه تمشي .. ووووين تمشي !! ونرقى فوق للسطح ونلقى لنا 3 اشخاص نعرفهم واقفين لا يقدرون يطلعون ولا يبون يدخلون ويقولون لابوي ابو فلان ارررررجع وواحد منهم طاف خمس اشواط ورجع من الزحمه معد قدر يكمل .... وتحسبون اهلي اقتنعوا ؟؟؟؟

مير ذيك الحزه مدري وش جايهم انا والله يوم شفت الزحمه جتني التكه .. وش بيدخلني بين هالرجال ؟؟ وانا خابرتن الوالد سماحه الله يجزاه خير مهب مهاوش احد ولاهوب ناتف احد .. ونرقى للسطح ووصلناه بشق الانفس - كيف شق الانفس ضابطه ؟ - ولا هي في الحقيقه تشعبطت بالوالد كل مامشى قلت والله ماتخليني ...
يقلع ام النشبه بس وش اسوي هم السبب ..
المهم وحنا بندخل القى عجوز بالعربيه ولدها يصرخ طريق طريق وانا اللي اشوف وجهها واصييح ..

يالله الشكوى لك ماعلى الخلق شكوى لين هالحين وقليبي معها قسم بالله ..
وندخل وامي تعطيني محاضره احمدي ربتس على العافيه وانا اصايح ومير نمسك خط الطواف

وفقيت خشتي ..

وش ذااااااااااااااااا والله فعلا الواحد يذكر يوم الحشر بالحج .. خصوصا بالطواف
يعني فعلا مواقف الطواف مواقف مضحكه مبكيه من المواقف المضحكه وإنا نمشي طبعا من كثر ماحنا لازقين ببعض نسمع سوالف العالم كلها ..

مصري يقول لخويه ياراجل ماتمشي انت تلاته ونص وانا تلاته ونص ويبأ خلصنا كده ..

والموقف الثاني واحد سعودي وش حليله ذابن اذنه مع مصري يكلم - طبعا اكيد انا ذابه اذني شي مفروغ منه - يقول هالمصري / ماتييييجي للسططططح تعال للسطح اهوه مافيش زحمه ...
ويقول له السعودي يررررحم والديك تحت احسن .. حلفت عليك تحت احسن وش تجيبه عندنا قل له يهون .. وضحك الجميع ههه هههه هه

ومن المواقف المبكيه المبكيه جدا ..

بنت ام سنتين تصيح صياااح يقطع القلب .. مدري جوعانه او فيه شي يعورها ..
ويرفعها ابوها ويقول يااارب يااااااااارب اررررحمنا يارب .. وقتها ..
زهقانين متضايقين واشهق ذاك الشهاق ويلتفت ابوي ووقتها زهقان وطفشان يده انخرعت من كثير ما تشعبطت فيها ويقول سكتوا هالبنت وامي تقول اسكتي وانا اقول شفتيها شلون سكتت ؟؟ تقول امي جالسه تضحك يوم رفعها وانا اقول وش تضحك اكيد نزل عليها ربي السكينه .." ياحبني للاكشن ياناس "

ومير اكل تراب ونمشي طبعا الوالد يمشي حول الباكستينه .. اقول يبه ارحمنا منهم ارحمنننننايقول ميخالف تحملي
هم الوحيدين اللي يسلكون الطريق .. وفي ذي انا اشهد يسلكون الطريق ويهدون الحيل

وفي لحظه ما .. قلت لبوي يبه من متى مااكلنا ؟؟؟؟
قال ليه فيك شي لا بس اسأل .. توقعته شي طبيعي اني احس بعظامتي هامله .. ونمشي طبعا كل شوط ياخذ مننا ساعه يوم جا اخر شوط الظاهر طقت طبولي واجلس في نص الزحمممممه .. يقول ابوي قومي وش فيك .. وانا اقول ها مدري امي اوجست خيفه وجت جمبي واناظر ابوي واتمايل .. قسم بالله لحظتها مدري ويني فيه ..
اسرد لكم على لسان البطل القومي اخوي اللي جعله مايصير بطل مره ثانيه ذل ام ام امي :

وتطيحين علينا ياسواتي .. وامي اللي تقول وش فيك امي وش فيييك ياامي سواااتي تسمعين .. وابوي يناظر مرتاع """" انا في نفسي اقول شكله يسترجع قبل ماندخل وانا اقول ترا انا مااتحمل """ ومايدري وش السواه وفيييي نص الزحمه لانقدر نروح يمين ولا يسار واشقلتس واصرخ على العالم تعبانه طرييق طريق ويوديني عند المدخل ..
طبعا المدخل شي لايحتمل ناس طالعه وناس داخله وسدحوني وجت ياسواتي دكتوره مصريه كنها طايحه علينا من السما وتسوي لك اسعافات مدري وش هي ..

طوط طوط

هنا انا افقت .. بس افقت على وشو ؟؟؟؟؟؟؟؟
على عسكري يهف وجهي ببسطه !!! قسم بالله يهف وجهي ببساط خوص
انا قمت اتلفت ماحس برجولي ولا يديني ورااسي يدور والرجال ملتفين حولي يناظرون وانا اللي اصرخ:
غطووووووووووني ..ماتخيلت إلا شوشتي يوم اتروش واتلفع بالطرحه
وتجي امي تفتش .. ياعميري ياميمتي تقول هاااه شوفي هذاني فاتشه
ورجليني رافعينها الله يستر علينا دنيا واخرررررره .. اشوا اني لابستن تايت وفوقه شراب مافيه امل يطلع شي الحمدلله

ويحركون حواجبي لحظتها والله ماذكر تفاصيل كثيره بس اذكر يوم حطوني على الكرسي وتجي عندي حرمه عجوز جمبي تقرى علي وتقول .. اتوقع انها تنصب بس تبيني اتحسن مدري والله وش سالفتها بس فاهمه التحسن غلط ..
تقول انا فقيره وبناتي يبون يحجون ولا قدرت احججهم قولي الحمدلله ..
وانا اللي اصيح واقول الحمدلله الحمدلله وامي تقول خلاص هدي لاتصيحين يديني مقدر احركها شي يالله لك الحمد على العافيه ..

ويبون ينزلوني وانا اقول لااا خلونا نكمل تخيلوا مابقى إلا شوط ؟؟ ومير يلقطوني بالكرسي ويشربوني عصير وهالعجوز اللي يزدي لها ويفرج لها هي والمصريه عطت امي مره قالت خليها تشمها .. وشوي امي تدخل المره في مخي .. قسم بالله شميت يمه خلاص شميت ..

ونطوف وانا بالعربيه وياضيقه الصدر استغفر الله .. وسعينا بالعربيه
وطلعنا من الحرم وانا بالعربيه ومشينا بالشارع وانا بالعربيه
واخوي يدف ويصرخ طريق ياحجي طريق ياحجي طريق ياحجي .. واذا حنش احد قال حج
ياحاج حج ياحاج .. والظاهر جته فتره يهوجس وعاده اكثر من مره ويلتفت عليه واحد ويقول معليش علق الشريط هههههههههههههههههههههههه

ويمسكني ابوي - دوريه هالعربيه هههههه - ونمشي بالشارع وندعس على رجل سوداني ويقول اااي قاصدها .. يقول ابوي والله ماقصدتها انا اسسف .. يقول ااااي قاصيدها ويسفهه ابوي ويمشي والا هالسوداني يدعي دعاوي .. يوم مر من عنده اخوي ويزقطه يقول وش تقول ... ارتاع السوداني وقال داير صدمني الله يسامحو ههههههههههههههههههههههههه
ونركب السياره مع وحدن .. شكله ماخذ سياره عمه ويكد عليها ...
ابوي من شاف وجهه قال مارتحت مع ابو مناظر ذا
ونركب ونروح للطايف ... طبعا السر الاساسي في حماس اهلي للاستعجال حجزنا كان 11 .. وطلعنا من الحرم 12 .. من اربع إلى 11 طواف والسعي وربي ماخذ نص ساعه بالسطح

ونركب مع ابو مناظر اللي عزر بابوي تعزير يقول له ابوي ورا ماقلت لي انك ماتعرف شي ؟ ويقول انا اعرف المدينه :) ... طيب ورا يوم اقول لك الطايف تقول يله ..
ويعطيه ابوي خمسميه ريال وفرح بهال هالضعيف ولا درى ان 300 بتروح عليه من ساهر لعمه ..
وسكنا بالفندق ونمنا نووومه يالله لك الحمد توقعت ابقوم وانا اون بس الحمدلله قمنا نشيطيين ونزلنا افطرنا وعينا من الله خير ودقينا على هانكو وجابوا لنا باكستاني يودينا للرياض بألف وخمسميه
وذهبنا إلى الرياض ونحن سعيدين وتفرجنا على المناظر الجميله لبلادنا العزيزه
وشفنا المحطات النظيفه ..
وشفنا سيارات العسكريم الفاخزه ..
وشفنا الشوارع الممهده اللي لو تحط راسك نمت وانت ماتحس تحسب انك بالسرير ... - اي هين -
طبعاً الطريق من الطايف إلى الرياض كعاده اي عائله سعوديه مابين البلع والهواش .. ونفسيه اخوك كل دقيقه ناطحن لنا اغنيه ولا شعر يغرد بها
ارحمونا ياظلال مساري

والحمدلله الذي تتم بنعمه الصالحات ومابغيت اخلص الموضوع
واعذروني على التأخير بس تخبرون الحال

وهالله الله بالردود ترانا شارينكم