خاينه وما تنصافين ، ياللي خاب ظني فيك !

قائمة بأسماء الأعضاء المهشتقين في هالموضوع :
اكتب أسماء الأعضاء اللي ودك تهشتقهم في هالموضوع وافصل بين يوزراتهم بفاصلة زي كذا : فالكم طيب، منجطل بالطاية، فارس، رماد انثى All Friends

15-9-2011, 7:57 AM

مشاركة رقم المشاركة : 1

قطرب

كـلامـه على مـتـمـه

قطرب غير متواجد حالياً

الأوسمة

خاينه وما تنصافين ، ياللي خاب ظني فيك !

إهي إهي إهي

، ماشفتيه وش يزين معه

! ، والله إنه فرى تسبدي فري عساه ينفري تحت تريلة ولا يبقى به عرق ينبض

!. يادافع البلاء والوباء والزنا والزلال والفتن ماظهر منها ومابطن ، وراه وش هو مسوي يا أم سليمان

؟ البارحة يا أم محمد قمت من النوم بتسنن قبل الفجر ، تسان اسمع أصوات خرفشة وحركه غريبة ، وأنا اللي أرجع لغرفتي وركيباتي يتصافقن من الخوف ، وقلت بنادي أبو سليمان ، والله واستجمع قواي الظاهرة منها وما بطن واطلع عصا المكنسة الحمام ، وأروح له عند غرفة الجارة ، وأنا رايحتن له كل ماقربت لغرفة الجارة يزود الصوت ، وتطلع أصوات ضحك وقهقه

، يوم وقفت عند باب غرفة الجارة ، سمعت مالا عين رأت ولا أذن سمعت عساه للمرض المتلاحق ، والهم المتلاصق ، وش شفتي يا أم سليمان

، كتمتي نفسي كملي لاتوقفين ، أنا أول ماوقفت عند الباب لصقت إذني بتأكد الصوت من الغرفة وإلا لا ؟ ، عاد يوم حطيته وش سمعت وش ما سمعت ، مراااجة يا أم محمد وكلامن فاهر عجزت أتخيله ، وهي ما سمع غير ضحكه عساه تضحك ولا ينصك إثمه ، والله إني قلت بتطيح علينا السماء والا بيخسف بنا بالأرض من هالحتسي اللي سمعته ، ماقدرت أتحمل دخلت عصا المكنسه بأذني اليمين وطلعته من اليسار بسده مابي أسمع أكثر ، وقلت أخسي يابنت اللذينا جايبتن رجال للبيت يالخسيسة ، وين أبو سليمان هالمهبول عنتس طايرين بتس ولا يدري وش تسوين بالبيت وبغرفته ولا بسريره بعد

، تسان أرقى فوق لغرفة جنيني ووليدي سليمان أقحصه يكلم أبوه يشوف وش يصير في بيته ، والله يا أم محمد قحصته ونزلت معه تحت ، يوم وقفنا عند الباب قلت تعال ياوليدي به رجالن غريبة عند مرت أبوك أبيك تدخل وتمسكه ، ولفيت رأسي له قلت اسحب عصا المكنسه أبيك تدبغهم كلهم ، قال سمي يا ميمتي ، يوم قرب للباب قالي يمه تعالي تعالي ، قلت وشو ، قال صوت أبوي اللي من داخل قلت هوو وشو ؟ قال إيه تعالي اسمعي ، يوم حطي إذني إلاه صوت أبو سليمان بس ماصدقت ! وأنا اللي أنسدح وأويدز من تحت الباب ، ( يعني أرى من تحت الباب ) ، وإلا هو شايبي عساه تشب عظامه ويحترق ولا يبقى منه الا سره

، يتلاحق هو وإياه كنه عادل إمام ويسرا بفيلم كراكون في الشارع ، عجزت أتحمل وادخل عليهم معي العصا ساحبته من ولدي ، وألسبهم تلسيب ولعنت خير هالنتفه ، وجاتس الشايب زامن سرواله بحزامه ويالله يشيل عمره مايقدر يمشي ، والله لو يفوحج برجوله شبر طاح سرواله تحته ، ناظرني ومسح على طرف شنبه اللي أكل عليه الزمن وقال خير خير إن شاء الله يا هالعجوز أرحمينا أنتي وصباح موتوا ، عطوا فرصة لغيركم بالحياة ، تسان يرتفع ضغطي زود يوم سمعت حتسيه ، واشوفلتس ذيك النعله الفصفوريه وأهفه عليه ذيك الهفه اللي خلته يمسك زاويه غرفته ويزوي براطمه

، وطلعت فوق وصكيت على عمري لساعتس يا أم محمد ، سنعين يا وخيتي أنا أبي اطلب الطلاق خلاص عافته نفسي ، هااااو انهبلتي يا أم سليمان

، كلش عاد ولا الطلاق تراه أبغض الحلال عند ربي وأنا أختس ، مير وسعي صدرتس هالحين تراه دايم يقولون مايقوم الحظ إلا حق الشقلة والبقلة وشينة الخلقة

، وإلا أنتي وش زينتس وملحتس بس يبي لتس شوي تهندم وتدهن وتغطين على بنت عجرا أو هي عجرم

، ويصير أبو سليمان ما يشوف غيرتس ولا يتعدا فراشتس مثل أبو محمد

، لا يختي ماش مالي نفس بهالشايب ، أقول هاها بس عن التدلع أنا بجيب عدتي وعتادي وبجيتس بعد شوي قومي تروشي على بال ماجيتس ، اليوم بسمكرتس وبرزتس ، بعدين أنتي مالتس غير رجلتس ، أهلتس يامال الجنه وماتوا لو تطلقتي وش بتزينين وين تهفين

؟، مير تماكني روحتس لا تشفطه شينه الطبايع ذيتس ، خلاص زين بحتريتس بس لا تبطين علي ، خلاص طيب مع السلامة .

وقبل ما تقبل ام محمد سبقه صوته اللي يقول ياهيه ياللي كلتس ملح وقبله لآمن نقضتي هالعكاريش ونمتي على مخدة الريش ، وبيده اليمنى شنطة دبلوماسية زي حقات الأفلام اللي يتبادلون فيها الفلوس والمخدرات ، واليسرى كيس بلاستيك حق أسواق العثيم ، وتقعد أم محمد وتفتح الشنطة الدبلوماسية وتحط الأكياس قدامه ، وتقول لأم سليمان خليتس قدامي ساعتين وحزبطك ، حنكسر الدونيا ، بتصيرين نجمة البيت الأولى إن شاء الله

، ان شاء الله يا أم محمد ، طيب الحين خلينا من الحتسي ، معين تبين نبدأ يا أم سليمان من تحت وإلا من فوق وإلا من النص ؟ خير الأمور أوسطها مير أبدى من فوق يا أم محمد

، وتدخل أم محمد رأسه بالشنطة وتقعد تحبرش وتجدع وراء ظهره علب وكراتين لين وقفت تجديع وهي تضحك ضحكه شريرة هيهيهيهيهيههههههههههههاي ، وتطلع بيده كيس وتقول هذا هو يا أم سليمان ، وش ذا يا أم محمد ؟ وتقوم أم محمد وتطلع البروجكتر حقة وتطفي النور ، وتطلع القلم اللي يطول يطول يطول ويصير كنه معلاقة ملابس مفلوله :

- 1 -

عزيزتي وقرة عيني ونتفة حاجبي الكريمة أم سليمان ، هذا سلمتس الله منتج يسمى الحناء ، وهو زين للشعر و يداوي كثير من مشاكلة ، وانتي بسم الله عليتس شعرتس منتفش كنه قبة رويال مول

، والآن عطيني سمعتس وعقلتس عشان بعلمتس وش يزين ذا المسحوق الاخضر بالشعر :
- اللي شعره كنه صوفة مكينة ، مليان دهون وزيوت ( الشعر الدهني ) ، يعتبر الحناء من أهم الأشياء اللي تخفف كمية الدهون بالرأس وتقاوم زيادة الإفرازات .
- اللي شعورهم كنه شجرة برسوبس لامريت من عنده نص ورقة طاح

، وأقصد اللي شعورهم مليانة قشرة ، وأنتي سلمتس الله ماتخلين من القشرة بسم الله عليتس كن رأستس جوز هند مفقوش

، الحناء هذا يعتبر دواء للمشكلة ذي ، وعلاج للإلتهاب فروة الرأس والحكحكة اللي تجيبه القشرة .
- وترا الحنا ما يخلي شعرتس يحت ويصقع ترى به مادة زينة مثل ذاك الديتول اللي يقتل 99 من الجراثيم ، يعني زين للي مايسحبون كثير وتعشش بروسهم القمل والصيبان

.
الله يازينهيا أم محمد طيب لا شريته ، اكبه فوق راسي علطول والا اخلطه مع شيء ؟
على رسلكِ يأم سليمان ، هالمنتج ذا ما هنا اكثر من طرق خلطه و استخدامه ، وحيث انتس غاليه عندي بلحيل بقولتس القواعد المثلى على قول الدخاتره :
أولاً : لابد أن تكون كشتك نظيفة تماماً .
ثانياً :إلى منتس حطيتيه فوق راستس احسبيلتس من 4 الى 6 ساعات واغسليه مهب تمرحين به .
ثالثاً : مثل ما قلتلس قبل لا تتركين الحناء على شعرتس بالليل وتنامين أعرفتس دفاية أنتي لا انسدحتي طفيتي

، عشان ما يتلزق ويتقصف شعرتس بعد الغسل وتدعين علي .
رابعاً : بعد ماتغسلين كشتس بتغدي مثل صوف العنز

، لازم يصير حولتس كريم الزبد وتلطين منه فوق الكشه عشان الحناء شفط كل الدهون اللي بالكشة ، أو شوفي لتس أي دهون للشعر .
خامساً : لاجيتي تغسلين الكشه من الحناء ، لايقربه شامبو ، امحضيه بالماء عشان يغدي لونه حــمر يــوخ ( حمر يوخ تراه احمر غامق الاولين يسمونه تسذا ) ، ومن باتسر اسبحي ثانيه يا مال الغناه وحطي شامبو خلي جستمس هالمتقشف على الماء ، كوده يترطب شوي ويلين كنتس مرت ضب على هالجلد.

وينتس عن هالسنين يا ام محمد هالحين انا عرفت هالقواعد اللي سردتيهن علي بس ماحولتس خلطه تخلي شعري يتهلهل مثل ذيل الحصان ، ولا يهمتس يا أم سليمان لو تبين رأس جديد جبناه لتس كم لي من أم سليمان انا ؟ الله يسلمتس احرجتين ، كولي تبن واسمعي هالخلطه السريه اللي خلت فيفي عبده ترجع للفن من ثاني .
هاتي لتس حناء يماني خام ونقي لا يهك عليتس ويعطيتس شي مخلط ، بعدين سلمتس الله جيبي ، زبادي ، وبيض ، وزبدة ، وثلاث ملاعق خل تفاح ، وثلاث ملاعق عسل ، وفص ثوم ، وماء فاتر ، طيب وراه ماجيب بعد كيسة لحم ورز وأزين العشاء على دربي ، أقول اسمعي وانتي ساكته و اخلطي ذولي زين جعلتس الخلط وخليهن مابين 30 الى 45دقيقه ، بعدين افرقي شعرتس من النص تسنتس تبي تحطين قرون

، همن اشقي هاللي فرقتي خلي نصه يجي قدام ونصه يروح وراء ، وأبدي بالتلييص من الجذور حتى الأطراف ، وافركي الفروة وانتي تلييصين ، بعدين ، لزقي الشعر ببعضه ، وليصيه من فوق عشان نضمن إن الشعر كله يجيه حناء وغطيه عشان ما يلحف رأستس هواء وييبس رأستس والحناء خليه تسذا مثل هالمره اللي بالصوره .

ولا خلصتي تلييص غطيه زي تسذا ، عشان ما يلحف رأستس هواء وييبس رأستس والحناء .

واتركيه المده اللي علمتس ، ثم أغلسيه مثل ماقلت بالضبط ، ومن باتسر هاتي زيت خروع ، وزيت زيتون ، وزيت جوز هند ، وزيت سمسم ، وزيت ثوم ، وشوي زيت صبار ، خليهن كلهن كثر بعض الا الصبار ( ادون ) اقل منهن ، وغطسي شعرتس به ساعة ، بعدين اسبحي بيطلع شعرتس أطلق من شعر ميساء مغربي

، ولا تنسين دام الحناء متوفر يالله من فضله ، جيبي لتس سودانية تخضب لتس يديتس ورجليتس ، خلي أبو سليمان لا شافتس حس إنه قاعد على سجادة إيرانية ، وإلا بمعبد بوذي

، وبيحس بالراحة والخشوع وماراح يهوش ولا شيء وبتقدرين تطلبين اللي تبين منه

، شوفي هالنقوش .

،

وإلا تسانتس ماتبين تجيبين أحد حطي كوب بلاستيك من الحناء وكاسين ماء وأخلطيهم مع بعض ، وحطيهن بديتس وصكي يديك عليهن لمدة ساعه ، وبيصير معتس تسذا .

، والله اني تحمست يالله بقوم الحين أزينه ، وين رايحة يابنت الحلال اصبري باقي سلايدات ثانية توتس يبي لتس إعادة هيكلة

، طيب لا تنفخين ياوخيتي وورين اللي عندتس.

- 2 -

هذا الديرم يا أم سليمان ، وش يصير لدارم حق البلكونه ؟ ، من جماعته يا أختي ، ما شاء الله ، كمخة أنتي ؟ شايفتنا بحصة أنساب وعلوم انسان ، اسكتي وخلين أعلمتس وخلي مداخلاتس الثرية بنهاية الحلقة ، سلمتس الله الديرم يسمونه صبغة الرمان ، جايبيه من قشور شجرة الرمان ، إذا حطيتي الديرم على براطمتس بتصير لونها لون رمان ، تقولينه صادزه يا أم محمد ؟ إيه أصغر بناتس العب معتس وأتسذب عليتس أنتي ماسمعتي نزار قباني يوم يقولتس : تلك الشفتاها أشهى من زهر الرمان ، إن شاء الله من بعد ما تحطينه بيدمن عليتس أبو سليمان وكل ماشافتس غناه لتس ، جعل جارتس تغني من الوجع ، وتراه مفيد بعد لضروستس وسنوتس وبعد لبراطمتس ، طريقة إستخدامه طال عمري ، أول شيء لازم تشرينه ، لأنتس لو ماشريتي ماراح تستخدمينه ، صح ، هو يبناع بمحلات العطار بريالين ولا نشبتي بحلق راعي الدكان صار بأقل ،
أولاً بنشوف إستخدامه للبرطم : جيبي قطعة من الديرم وقطعيه بيديتس أو بسنونتس أو بمقص مقاس براطمتس ، وحطيه على البرطمة لين خلاص يقضي ماتحسينه قضى ، وش لون أدري إنه قضى ، يعني لين يصير وهو في برطمتس كنه كرتون منقع بماء ، طبعاً كل شوي حطي لين ما يجوز لتس لون برطمتس بس لا تطولين مرة بعدين يسود ، وترا طعمه به مرارة ، لا تبلعين ريقتس وينقز بتس مر ، جيبي جنبتس زبالة وإلا صورة أبو سليمان وتفلي عليه

، أو ياطويلة العمر نقعيه بماء وخليه لين يتغير لونه ، بعدين حطي من هالماء على البرطم لين يتغير لونه ، واذا قضيتي من حواق براطمتس أغسلي إثمتس وفرشي السنون لا يصير عليه جير ، أخبرتس بسم الله عليتس تجترين كثير واثمتس صاير مخزن أكل للذبان

، جيبي ذيك الديرم اللي نقعيته بماء حق براطمتس تسان بقي ، وإن مابقي نقعي من جديد ، وتمضمضي بالماء بتصير لون لثتس دم غزال

، ومع المضمضة بتنصبغ اللثة بلون أحمر ، ثانيا للسنون : وإذا قضيتي متمضمه جيبي ديرم وفرشي به سنونتس زي المسواك ، بتلاحظين انهن يبي يبيضن ويزينن ويصيرن كنهن عقد لولو

، والحين قضينا من الديرم اسكتي لين أخلص من اللي بعده .

- 3 -

هذا الروج السحري

، هذا اللي بيقلب موازين القوى بالبيت ، هذا سلاح دمار شامل لأبو سليمان ، هذا اللي بيخلي أبو سليمان يجيتس يحبى حبيان

، هذا سلمتس الله روج سحري لونه أخضر ، ولاحطيته على البرطم صار أحمر

، سبحان الله ولا إلله الله والحمدلله والله أكبر ، شلون تسذا ، لاتقولين وش لون وكيف أنتي طبقي اللي أقولتس عليه ، هو لونه أخضر بالأصل بس يصير أحمر لأن عيون اللي قدامتس تنسحر فيتس وتشوف كلش زين ، يعني أبو سليمان بيشوفتس يارا والا سمية الخشاب

، لطي منه على براطمتس لين تورد

، ومع الديرم اللي من شوي بيصير اثمتس كنه فحم شيشة مولع بظلماء

، يعني بولع بالظلماء

؟ إيه يا أم سليمان بتغدين زي لمبات القطط اللي بالطريق السريع ، وبيجي أبو سليمان كنه تريلة بدون فرامل بيلاحقتس

، أيه نسيت بعد ، تراي سمعت بس ماجربت إنه يبيض الأماكن السوده بالجسم ، يبيض الركيبات والإباط

، إلملطيهن منه وجربي ، وتسانه ضبط معتس علمين أجرب أنا

.

،
،

- 4 -

هذي سلمتس الله المحكلة ، تكحلين به عيونتس هالمغمصة ، عشان تزين وتكبر شوي وتصير كنه عيون بقرة من وسعه ، وهو بعد يقوي النظر ويحافظ عليه ، طيب شلون أستخدمة ؟ شوفي سلمتس الله ، امسكي هالنقوش اللي فوق ، يعني امسكي رأسه ، وحركة كنتس بتدقين سلف تشغلين السيارة

، معرف أشغل سيارة بعدين السواقة ممنوعه عندنا يالليبرالية ! ، الله يصبرن عليتس بس ، يا أم سليمان ، امسكيه من فوق وحركيه عكس عقارب الساعه بينفتح معتس ، ومع عقارب الساعه بتصكينه جعله ينصك عليك بسجن مع استيفوتن ، إيه الحين فهمت طيب وبعدين ؟ ، أخسي يالفيزيائية الحين مافهمتي شلون تدقين سلف موتر وفهمتي قاعدة اليد اليمنى

؟ إيه مانيب هينه أنا ، تراي اعرف العب منبولي

، الله لا يضرتس يالبلطان ، المهم لامنتس فتحتيه جعلهم يسوون لجارتس عملية فتح قلب ، روحي قدام المراية وغمضي العين اللي بتكحلينه وافتحي الثانية عشان تشوفين ، وافتحي اثمتس عشان تحافظين على إتزانتس وتصير يدتس مرنة وخفيفة ، وخيل الرمش طالع لقدام امشي برأس الكحل عليه ، وسوي نفس تسذا بالعين الثانية ، عاد أنتي مخمختس بالتحكحيل ، يابتصير عيونتس زي هيفاء حسين وإلا بتصيرين مصاصة دماء ، ودي أصير مصاصة دماء

، أخسي يالمتوحشة هههههههههه ، لاتضحكين تراي صادزه ، أقوله الفقيه بس وتعالي نشوف اللي بعد هالمكحله .

،
- 5 -

هذا سلمتس الله ، له اسمين ناسن تسميه الورس ، وناس تسميه الكركم ، اللي بالطاسة ذا مسحوقه واللي تحت هو النبته قبل السحق

، وش السحق ؟ ياكثرتس ويا كثر أسألتس اللي بلا فايده ، مالتس دخل اشتري المسحوق حقه بس ، وجيبي قدر صغير أو طاسه أحسن وحطي به قدر فنجالين وكبي عليه ماء ورد ، وأبغثيه ( أي اخلطيه ) ببعضه لين يصير زي الهجينة بيدتس ، وحطيه على جسمتس تقريباً زي الوقت بين إذان العشاء والإقامة

، طيب وش فايدته أنا أخاف يصير زي الجص ولاحطيته يبس علي وصرت صنم مقوى أتحرك

، لا وأنا أختس لاتليصينه زي الحناء ادهني بس زي الدهون ، ولا تخافين أنتي سوي اللي أقولتس عليه وبتزين أمورتس ، هذا طال عمرتس يفيد جسمتس هالمشهب ، يبيضه ويفتحه ويشيل السواد ، والنمش والبثور والبقع ، وبقايا الجروح القديمة ، ويشد الجسم والصفوط اللي بكرشتس ويعطيه لمعه بعد ، بترجعين وكالة يا أم سليمان

.

،

- 6 -

بعد ماتقضين يا أم سليمان من المراثون اللي فوق ، خوذي ذييا وتعطري به ، اسكتي أدري وش بتقولين ، هذا سلمتس الله اسمه مرش ، ومن داخل فيه عطر يحبه قلبتس ، لازم تتعطرين لانتس بتتحركين كثير بعد السباحة والتحمم وأكيد بتفوحين من الريحة ، وأنتي بسم الله عليتس مايحتاج ديزل ، يالله تحتمين وإلا أحتميتي طلع كربونتس مرتن وحده بكل مكان

، جيبيه ورشي ملابتس عليه وجسمتس وان شاء الله بتصير ريحتس من زينه تجدع الطير من السماء .

،

والحين قضينا يا أم سليمان ودوتس هالكيستين ، بهن قمصان روز يأخذن العقل وكم شلحة خايطهن أنا بيدي ، يبطي فيكتوريا سكرت يخيط زيهن

، لا تزينتي وقضيتي تلبسي وأدخلي عليه

، وعلمين وش يصير معتس

.

،

- تتوقعون وش صار عقب ما سوت أم سليمان كافة الأوامر والتعليمات ، هل رجعت المياة لمجاريها ؟ أو تطلقت ؟ أو جته سكته قلبية و مات أبو سليمان يوم شافه ؟ وإلا هج وصار بعداد المفقودين ؟

- وش رأيكن يا بنات وأخص بالذكر منجطل وخويطر بالزينة ذي

؟ وهل تحسون إن له فايدة بهالوقت في ظل سطوة ماك وشنيل على أدوات الزينة والتجميل أو لأ

؟

- من منكن جربت بعض من هالزينة ؟ ياليت تذكر لنا تجربته عشان نستفيد

، واللي جربت الكل ليته تقولنا عشان نراسل متحف الملك عبدالعزيز ونشوف له مكان هناك

.

- بالنهاية نبي رأيكم بأدوات التجميل القديمة ، واللي عنده أداة مانعرفه يعلمنا وأخص سكان المناطق الثانية مب حقين نجد

، ودي أشوف وش عندهم

.

،

انتهى ،،

فارس و هايدي مطحس معجبان بهذه المشاركة .

توقيع قطرب :

واشوف الودّ فـي عيونك ولكن ... يردّ الودّ خوفٍ فيــــــــك منّي !

15-9-2011, 10:54 AM

مشاركة رقم المشاركة : 2

ساندي

إداريه متقاعده

ساندي غير متواجد حالياً

الأوسمة

رد: خاينه وما تنصافين ، ياللي خاب ظني فيك !

ويوم انه أم سليمان البست ذاك القميص الحمر وليصت من هالديرم الحمر وتكحلت من هالمكحله وضربت اريوس عند زاوية العين لين شقت الخط السريع على مخرج احدعش مثل ماوصفت له أم محمد .! وامشطت شعره عقب ماصار املس من عقب الحنه واشقته لنصين وجدلته من اعلو راسه لين موخرته ورشت من هالرتوش لمين صارت مبخره تطرد ورى هالجن .. وهي اللي تلتف تناظر نفسه بالمنظره .. ويه يأم سليمان وش غديتي وش صرتي لا اله الا الله ألف من ذكره ذي أنا ماصدق غديت تسني عروسه متزينة لليلة عرسه ويه ياربيه استحيت هذا وابو سليمان ماشافن ياعله مايشوف من الحور العين غيري ,, وياعل جارتي بالدرك الاسفل للسافلين تركض ورى ابليس كوده يعرس عليه ويفكنا

وعلى طرف لسان أم سليمان ذي التسلمه الا اللي يدخل عليها أبو سليمان توه راجع من صلاة الجمعة منهو ذا اللي يعرس عليها ! مير وينتس يامُره انتسبي لي الغداء مع طويسة لبن واتميرات .. سم سم يابو سليمان من عيوني اللي ماتحجبه عين الشمس .. وهي اللي تفرش له السماط

ابوتس من انتي يامُره من انتي !!! هاااو يابو سليمان ماعرفتن ؟ الا الا وش بلاتس صايره تسنتس عنزٍ مجترينه من مصلخ ؟ وش مصلخه الله يفرك بتسبدك القولون لين يغدي كرشة تيس ,,, هذا جزاتي اللي متزينتن لك ومتحكلتن لك و و و و اهي اهي .... وهي اللي تناشق وتمسح ادميعاته بغدفته ..
يأم سليمان بستس بستس ترى دموعتس غاليتن عندي وتعرفين مقدارتس ماوالله تاصله مُره بهالدنيا أنتي أم عيالي الأوله والتاليه .. ماأقولتس لاتتسنعين بالعكس زين ان المُره تتزين عند أبو عياله بس خففي من حمرتس شوي الله يصلحتس وتغدين وش زينتس .. وترى الرجل مايبي من المُره الا الكلمه الطيبه والزينه ..
أبشر يابو سليمان مايصير خاطرك الا طيب ..

وهي اللي تزهم على أم محمد .. وتقوله السالفه كله من طقطق للسلام عليكم .. بس بس ياام سليمان دواتس عندي باتسر قبل مايصبح الصبح وقبل مايذن الديتس تلقينن واقفه قبال بيتكم ومعي لتس شرطان فيديو امسجلتهن كله عن رومانسية مهند ونور .. عاد انتي خوذي الزين واجدعي الشين وعقبة استغفري ونامي مالتس هم ياوخيتي اضبطتس

( الله يستر منتس ياأم محمد

)

على فكرة الحنة والروج السحري لازالوا بعض البنات يستخدمونهن .. بخلاف المكحله مع الوقت تطورت المنتجات وصار كحل يبرى بالبراية
بس بالنهايه كل جدة أو أم اعجيز لاتخلو من هالادوات القديمة بس مالك داعي تنسى كريم ليدا أبو وردة

ماشاء الله عليك ياقطرب حااااااابك القصه وضابطها نعنبو دراك دخلت جو شكيت ان اللي داخله بيوزرك هي جدك مهوب أنت على هالحتسي الرزين المُصفف

مجنوووووون فعلاً ولا يتقن هاللهجه الا المجانين امثالك اهنيك على الموضوع الساخن وعلى استرسالك للوصف .. كان ودي اضيف أدوات أخرى للزينة لكن ماشاء الله ماخليت شي ماقلته اي صح تذكرت مشط الخشب والفرشه اللي تجي منها الوان فسفوريه اخضر واصفر وزهوري اللي تدخل اصابعك الاربع بعروته .. خابرته عندنا ان لقيته صورته لك

.
.

توقيع ساندي :

تم التوقيع :: ܔܓ܏ܛ

15-9-2011, 9:29 PM

مشاركة رقم المشاركة : 3

بنت ابوها

توه ضايع

بنت ابوها غير متواجد حالياً

رد: خاينه وما تنصافين ، ياللي خاب ظني فيك !

ولا تنسون هذا

كان له سوق اول لانه يصبغ اسرع من الحنا
يوم كنت صغيرة امني نفسي اني اذا كبرت ابحط منه ويوم كبرت هونوا عنه

بشفي احط منه

شكرآ لصاحب الموضوع المحبوك

15-9-2011, 9:34 PM

مشاركة رقم المشاركة : 4

Tami

من كباريه الضياع

Tami غير متواجد حالياً

الأوسمة

رد: خاينه وما تنصافين ، ياللي خاب ظني فيك !

هههههههههههههههههههههههههههههه

يالبى القصمان

قطرب للأمانه شكيت بأنك بنت و قاعد تلعب علينا
وش هالثقافه ماشاء الله
تصدق عاد استفدت

بجرب الكركم .. فيه عندي بقع من الليزر < ياليل هالبقع للحين

الله حلوو

بس أحس ما ينفع الا ف المناسبات

ف الأيام العاديه حلو اتحنى زي منى أمرشا

قطرب انت شي مش طبيعي

16-9-2011, 9:03 AM

مشاركة رقم المشاركة : 5

DANA

من كباريه الضياع

DANA غير متواجد حالياً

الأوسمة

رد: خاينه وما تنصافين ، ياللي خاب ظني فيك !

اشك ان الي كاتب الموضوع جدة امي العاشره

قطرب لاول مره احس ان يوزرك يخفي معلومات انثويه نجهلها نحن معشر النساء نعنبوا دارك ماعرفت فايدة كركم البشره الا منك

لا والمصيبه اني استخدم الكركم غلط بعد كنت احطه مع فازلين وتمرخ فيه بس اكتشف ان الكركم يلصق مع الفازلين فيصير لوني كنه واحد بوه امساك ومحتقن

لا ياقطرب الصراحه مالك حق انت على ذا الموضوع مفروض تتعاقد مع فرع عبد الباسط ولا بن منقاش للعطاره وتسوق لهم منتجات نسائيه مندثره ،صدقني اضمنلك ربح ميه بالميه ومع الربح بيعطونك حلتيت ومُره مجانا

بس ونا اقرا موضوعك ذكرت منتج الصراحه وبلامبالغه مااستغنى عنه ابد ابد مدري وش وضعي من دونه

انا اعشق الديرم عشق لم يصل لعشقه الجدات من قبل

الصراحه شاريتلي كرتون منه من كثر ما انا ما استغنى عنه

بس طبعا ماستخدمته لين تغدي برطمي بنفسجيه وتصير تسنها محروقه

لا اكثر شيء احبه للاسنان الصدق يخليهم يلقن لق ويعطيهم بياض وثاني شيء ماطول فيه بس اخذ لون خفيف منه همن عاد احط فوقه اي روج وهذا وجهي اذا راح الروج ولا انمسح يقعد لنهاية اليوم

والي بتستخدمه نصيحه لاتطول وهي تفرك لان عقب بيصير شعورها زي شعور الي يبي يبستم وبرطمه مشقوق

الصراحه ياقطرب بدعت وونتظر منك ان شاء لله موضوع طبخات تراثيه تصنعها يداك<<متوسمه فيه رجا عقب ذا الموضوع

16-9-2011, 9:12 AM

مشاركة رقم المشاركة : 6

ملف شقراء

مشرف سابق

ملف شقراء غير متواجد حالياً

رد: خاينه وما تنصافين ، ياللي خاب ظني فيك !

أنا داخل عشان أرد وأقول شي واحد .. لا أحد يحط حنا ألا منى امرشا ..
هي الوحيدة اللي إذا شفتها ما قلت يع بدو !! .. وشكراً يا صديقي ..

مشتاقين ترانا

توقيع ملف شقراء :

BB pin: 273C6672
كن كما ( أنت )

16-9-2011, 7:48 PM

مشاركة رقم المشاركة : 7

يا حبني لك

яemәmвer мә
معزبة الكراسة

يا حبني لك غير متواجد حالياً

الأوسمة

المركز الأول - فعاليه الحكواتي الرمضانيه

رد: خاينه وما تنصافين ، ياللي خاب ظني فيك !

:: ::

لأ لأ لأ مايمديني ماشاء الله عليك هي وحده من ثنتين يا انك وحيد أمك و مع الوقت صرت بنتها وولدها

ولا إن امك و ابوك جابوك بعدين هاجروا فـ اضطريت تعيش عند جدتك

وش ذا الموضوع المارج

مابقى إلا شسمه إيه ليتنا من حجنا سالمين بس

بخصوص وش صار مع ام سليمان الله العالم إنها الحين حامل

اما استخدم شي من ذا الاشياء لا ياخي مدري كيف

حتى الروج الأخضر طرا لي مره استكشف كيف لونه اخضر و يطلع ع الشفايف وردي

فـ شريت واحد اجرب ماش احس كني ماكله اسكريم بابو ذاك اللي تدفه من تحت يطلع لك من فوق

قطرب ..

يامال العافيه و الرزق الوسيع

توقيع يا حبني لك :

:: ::

حسبنا الله سـ يُأتينا من فضله إنا إليه راغبون
حسبنا الله سـ يُأتينا من فضله إنا إليه راغبون
حسبنا الله سـ يُأتينا من فضله إنا إليه راغبون

17-9-2011, 5:25 AM

مشاركة رقم المشاركة : 8

منجطل بالطاية

مراقب مارج

منجطل بالطاية غير متواجد حالياً

الأوسمة

رد: خاينه وما تنصافين ، ياللي خاب ظني فيك !

قبل ابدا بالموضوع من الحين اعلمك السالفة تعدت الطلاق الى انه مسكه بحوش النخل ووجهه للقبلة ونحره هالبقره

.. قطرب ياخي وش سويت انت .. انا شفت عنوان الموضوع قلت شكله بالبلكونه اذا خربت صار بالتشليح

.. اما موضوع منك وينزل بالدكة .. المشكلة اقرا الموضوع وبديت اشم ريحة بيت جدتي واتذكر أول يوم ان ليلة العيد كل الشعب صامّين ايديهم بغدف

.. رجع بي زمان أول يوم اني لا جيت احب راس جدتي تحس راسه يخرفش حاطتن باغة مغاسل على راسه عشان الحنا .. اللي يقهرن تخلينا نحبه ونستمتع بريحة الحنا بس اذا قرب حدا عياله بيمطخ راسه تدفه تقول وخر وانا امك راسي مليان حنا

.. على العموم انا جيت هنا وحطيت مكانس من عسبان النخل نبي نكنس الغبار اللي طلع مع الموضوع

اقتباس:

وش رأيكن يا بنات وأخص بالذكر منجطل وخويطر بالزينة ذي

؟ وهل تحسون إن له فايدة بهالوقت في ظل سطوة ماك وشنيل على أدوات الزينة والتجميل أو لأ

بصراحة يا آنسة يا قطرب دام خصيتين بالسؤال والله ما اردتس

الصدز حاولت اضيف اضافات تفيد الفتاة الخليجية وتظهرها امام زوجها بالمظهر الحسن لكن للأسف ما بقيت لنا شي يا قطرب كلش قلته .. لكن ماسمعت اللي يقولون مالحب الا للحبيب الاولي

.. لو مهما طغى التجميل وكثرت المشاغل سيبقى عبق الماضي هو المنتصر لا محاله

اسمح لي يا آنسه قطرب اضيف بعض الاضافات لتكمل الزينة

.. لا تنسى الشامبو الاحمر هذاك تراه يعطي لمعان ساحر لدرجة كانك تشوف شكمان مغطّس من قوة اللمعة

.. وحبيت اعطيك هالكيس به سروال خط البلدة عشان اول ما تدخل عليه ترفع طرف الروز عشان يظهر السروال بالخطوط المغرية

يمال العافية .. الصدز بغيت اتهور واحني شعري عقب الموضوع

توقيع منجطل بالطاية :

كثيرة هي عقبات الدنيا كما كثرة تحويلات الرياض

كل ما عليك تبحث عن درب آخر وتواصل حياتك

----------------

17-9-2011, 7:28 AM

مشاركة رقم المشاركة : 9

قطرب

كـلامـه على مـتـمـه

قطرب غير متواجد حالياً

الأوسمة

رد: خاينه وما تنصافين ، ياللي خاب ظني فيك !

يالله صباح خير ، وحيّ الله كلن بسمه بهالموضوع المبارك ، بسم الله نبدأ ببيسكل والله يستر من هاليوم اللي بدايته بردتس

اقتباس:

المشاركة الأصلية كتبت بواسطة بيكسل

)

حنا ما ضيعنا إلا المداخلات الهاتفية لو كلن سالي لحاله كان مشت أمورنا

، أخت بيكسل بحكم حسك الإداري وإنتس قد صرتي حمراء هنا ، تتوقعين هل الرجل السعودي وهو وكرشته اللي تنشاف على بعد ميل تقولين بالع له لستك وشعره اللي مالي جسهم تقولين أمهاتهم متحومات بقرود ، يستاهل الواحد يتزين له ويتكشخ

؟ طبعاً لا أنسى شين النفس والنقيدة على أي شيء

؟ هل يستاهل الاهتمام وإن الوحده منكن تخاف إنه يروح منه ويأخذ غيره

؟ ، طبعاً هالسؤال أنا مستثنى منه بحكم خشمي الطويل وقوامي الممشوق

.

[/QUOTE]

اقتباس:

على فكرة الحنة والروج السحري لازالوا بعض البنات يستخدمونهن .. بخلاف المكحله مع الوقت تطورت المنتجات وصار كحل يبرى بالبراية
بس بالنهايه كل جدة أو أم اعجيز لاتخلو من هالادوات القديمة بس مالك داعي تنسى كريم ليدا أبو وردة

الظاهر إنتس من جيل السبعينيات أنتي

، كحل البرايه آخر خبري به من أيام حرب الخليج

، أذكر كنت أحدد به رسماتي بالفنية

، مدري للحين موجودة الشركة اللي تصنعه وإلا تحولت لشركة أقلام رصاص

؟

بالنسبة للكريم المذكور أعلاه فمعليش المفروض يصير بأول سلايد لكن جل من لايسهو

، هو جيد وللحين عند أمي منيرة ، وأذكره زين للخدود لا اشهبت

اقتباس:

الله يسلمتس على هالمدح اللي مايجي إلا من ناس مهبل وماعندك أحد

، أما اللهجة فأنا من يومي وأنا جليس للشيبان والعجز ، كله عشان الأجر وعشان آخذ منهم الحكمة والموعظة الحسنة أجادلهم بالتي هي أحسن . <- ترى مب عشان سواليفهم المارجة

.

مشكورة يختي على الحضور والرد ، والله يسلمتس وماقصرتي ، ووجودتس في مقدمة الصفوف دليل شجاعتس واقدامتس ، والله يوفقتس

.

.
.

توقيع قطرب :

واشوف الودّ فـي عيونك ولكن ... يردّ الودّ خوفٍ فيــــــــك منّي !

17-9-2011, 7:32 AM

مشاركة رقم المشاركة : 10

قطرب

كـلامـه على مـتـمـه

قطرب غير متواجد حالياً

الأوسمة

رد: خاينه وما تنصافين ، ياللي خاب ظني فيك !

اقتباس:

المشاركة الأصلية كتبت بواسطة بنت ابوها

ولا تنسون هذا

كان له سوق اول لانه يصبغ اسرع من الحنا
يوم كنت صغيرة امني نفسي اني اذا كبرت ابحط منه ويوم كبرت هونوا عنه

بشفي احط منه

شكرآ لصاحب الموضوع المحبوك

ماسمعنا بهذا في آبائنا الأولين <- وش تبي ؟

والله يختي هذا شيء أول مرة أشوفه الصراحة ليتك تعطينا معلومات أكثر أو تشرينه وتجربينه وتعلميننا ، طبعاً لا تنسين تصورين خطوة بخطوة عشان الفايدة بس

.

مشكورة على ردتس وتواجدتس ، والله يعطيك العافية ماقصرتي

توقيع قطرب :

واشوف الودّ فـي عيونك ولكن ... يردّ الودّ خوفٍ فيــــــــك منّي !

صفحة 1 من 4

مواقع النشر (المفضلة)

« يقولون أسمها ( شاورما ) | // تكيه الصبايا [ 2 ] .. »

الذين يشاهدون محتوى الموضوع الآن : 1 ( الأعضاء 0 والزوار 1)

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الساعة الآن بتوقيت الرياض : 9:09 AM

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25