منجطل
للحين أحس إنك ( *** ) < مشفره بس ترى أول حرف (ث) وآخر حرف (ر)
بصراحه وبدون مجاملات ، ألاحظ عندك صعوبه في تحديد خيارات التصويت

يعني الشخص اللي مثلي يعجبه صباح العيد لين أذان الظهر ثمن يصير يوم العيد
أكثر ملل من باقي أيام السنه ، هذا وش يصوت له ؟

بعد تفكير عميق وتمحص < أدري إن فيه ناس بيدورون معناها في المعاجم ، بس بقولكم إن معناها [ تدقيق ] عشان ماتتعبون أنفسكم
اصبروا مسكتوني خط خلوني أقولكم وش اخترت
5- ما زال للعيد طعم

بالنسبه لي كـ حوطي وأتعيد عند أهلي في الديره
فـ نظامنا يكون
بعد صلاة العيد نرجع لـ البيت مع بعض ونجهز القهوه والشاهي والطيب والحلويات وهالخرابيط لـ الضيوف اللي يجون يسلمون على أبوي وعمي

والساعه 10 تبدأ تخف الزحمات نطلع حنا لـ أقاربنا اللي [ الحق لهم ] ونسلم عليهم
ونرجع لـ المسجد على الساعه 11 تقريباً ، ونلاقي الجماعه متكين في المسجد وكل واحد جايب ( عيده ) من بيتهم
ونسلم على الجماعه ونتعيد سوى
أطلع من المسجد لـ البيت وأنام لـ الساعه 11 تقريباُ < عاده سنويه
وبعدها أطلع لـ خالاتي مجتمعين في استراحه وأسلم عليهم كلهم دفعه وحده
وأروح لـ الاستراحه ونجتمع ويقولون بنروح لـ سامري وإلا خبيتي في الحريق ( بحكم كرهي لـ هالخرابيط ) أقول لهم بسلامتكم ويقنعوني وأروح معهم ومن زود الملل أطلع جوالي وأدق على أخوياي البعيدين وأعيد عليهم وبعدها نرجع للاستراحه ثمن يجيني إحساس بأن يوم العيد انتهى وألحين أنا اعيش يوم عادي من أيام السنه

وعشان كل الهرج الزايد اللي فوق اخترت مازال لـ العيد طعم
حيث تجمع الحاره في المسجد وتناول وجبة [ العيد ] معهم هذا إحساس غير ويحسس بالسعاده .

ومن بعد الظهر والشوارع فاضيه ومافيه شي جديد في العيد
إذا صار بيتكم على شارع رئيسي تشوف المبزره بعد العشاء مسوين مواكب وقروشه في الشارع تتحمد ربك وتقول أصحاب العقول في نعمه

أعياد قبل كنا نستمتع فيها يوم كنا صغر أكثر من الصغار ألحين
أتذكر أيام قبل كان يوم 29 فيه سوق الصباح يسمونه [ تاسع ] يكون كأنه سوق الخضار بس كل اللي ينباع [ ألعاب أطفال وبخاخات ثلج وبخاخات وخيوط ] < يازين هذيك الأيام كنا نلبس ثياب العيد في [ تاسع ]

أما ألحين صار [ تاسع ] كأنه مظاهرات
والله تشوف الناس تشب في الكفرات وتفحيط وصواريخ وقنابل على الشرطه

أنا أكون من صف المحايدين حيث أني أركب مع ولد خالتي وندور في الشوارع بهدوء وعقلانيه <

مدري أنا وش سويت ووش خبصت في الموضوع

اللي أعرفه إني صوتت
وخيارات لـ التصويت ماصلحت لي كلها ولاهي ملمه بـ جميع المعطيات <

بس مع ذلك
أحبك
وكل عام وإنت بألف خير
وعيد سعيد عليكم يارب

تـ ح ـيتي